: संस्कृति, पर्यटन तथा नागरिक उड्डयन मन्त्री खडक राज पौडेलले लिज मोडलहरू अपनाएर जहाज थप्न र नयाँ अन्तर्राष्ट्रिय गन्तव्यहरू विस्तार गर्न वायुसेवा निगमको व्यवस्थापनलाई निर्देशन दिएको बताएका छन्।
सिंहदरबारमा सोमबार बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समिति बैठकमा मन्त्री पौडेलले तत्कालै नयाँ जहाज किन्न सम्भव नभएको भन्दै लिगमार्फत जहाज थप्न र नयाँ अन्तर्राष्ट्रिय गन्तव्यहरू विस्तार गर्न व्यवस्थापनलाई निर्देशन दिइसकेको बताए। नेपालको पर्यटनलाई अघि बढाउन पनि राष्ट्रिय ध्वजावाहकको दुरावस्था सम्हाल्नुपर्ने भएकाले नयाँ गन्तव्यका लागि जहाजको संख्या थप्नुपर्ने उनले बताए।
उनले वर्तमान सरकार गठन भएदेखि निगमलाई निर्णय प्रक्रियामा पूर्ण स्वायत्तता प्रदान गरिएको र आकस्मिक अवस्थामा निर्णय गरेर भोलिपल्ट सूचना दिए पनि हुने व्यवस्था मिलाइएको उल्लेख गरे। निगम चक्रीय ब्याजदर जस्तै महँगो ऋणको मारमा संस्था परेकाले त्यसलाई सम्बोधन गर्न एउटा मध्यम मार्ग पहिचान गरी ऋण व्यवस्थापन गर्ने निर्णयप्रति सरकार प्रतिबद्ध रहेको उनले बताए।
मन्त्री पौडेलले हालः नेपालको करिब १५० अर्बको उड्डयन बजारमा नेपाल एयरलाइन्सको हिस्सा २० प्रतिशत भन्दा कम रहेकोमा, सामान्य मिहिनेत र जहाज थपेर यसलाई सजिलै ५० प्रतिशतसम्म पुर्याउन सकिने आकलन रहेको बताए।
उनले आवश्यकता अनुसार नेपाल एयरलाइन्सको सुधारका लागि सार्वजनिक-निजी साझेदारी मोडलमा जान सकिनेबारे पनि प्रधानमन्त्रीसँग छलफल भएको उल्लेख गरे। संस्था नाफा कमाएर बोनस वा लाभांश बाँड्नका लागि मात्र नभई राष्ट्रिय दायित्व बोकेको संस्था भएकाले कर्मचारीहरूले नियत सफा राखेर काम गर्नुपर्ने उनको भनाइ छ।
