। नेपाली कांग्रेसले १५ औं महाधिवेशनको उदघाटन समारोहमा सहभागी हुने अतिथिहरुलाई रुख अंकित खादा ओढाउने भएको छ ।
खादालाई काठमाडौंका आदिवासी नेवार समुदायको सांस्कृतिक पहिरनसँग मिल्दोजुल्दो रंग र बुट्टामा तयार पारिएको छ । सो खादामा कांग्रेसको चुनाव चिह्न रुखसँगै र पार्टीको चारतारे झण्डा समेत अंकित छ ।
कांग्रेसको १५ औं महाधिवेशनको उदघाटन समारोह काठमाडौंको खुलामञ्चमा हुँदैछ । उदघाटन समारोहमा अतिथिको रुपमा सहभागी हुन नेपालका साथै विदेशका विभिन्न राजनीतिक दलका नेताहरुलाई समेत बोलाइएको छ ।
उदघाटन समारोहपछि भोलि र पर्सि बन्दसत्र हुनेछ । बन्दसत्रमा करिब ७ हजार बढी प्रतिनिधि सहभागी हुने कांग्रेसले जनाएको छ । प्रतिनिधिहरुका लागि लागि हिमाल, पहाड र तराई–मधेश नामका तीन हल तयार पारिएको छ ।
नयाँ नेतृत्व चयनका लागि सोमबार दिउँसो २ बजेदेखि साँझ ६ बजेसम्म मनोनयन दर्ताको कार्यक्रम छ । मतदानमा विद्युतीय भोटिङ मेसिन प्रयोग नहुने कांग्रेसले जनाएको छ ।
