: नेपाली कांग्रेसका प्रवक्ता देवराज चालिसेले निवर्तमान सभापति शेरबहादुर देउवाबाट पार्टीको १५ औँ महाधिवेशन उद्घाटन गराउने आफूहरूको इच्छा रहेको बताएका छन्।
आफूहरूले देउवालाई अग्रज नेताका रूपमा सम्मान र सम्बोधन गरेको उल्लेख गर्दै चालिसेले देउवा महाधिवेशनमा आएमा सिङ्गो पार्टीले सम्मान अनुभव गर्ने बताए। पार्टी सभापति गगनकुमार थापाले सार्वजनिक समारोहहरूबाटै देउवालाई महाधिवेशन उद्घाटनका लागि आग्रह गरिसकेको उल्लेख गर्दै उनले बाँकी कुरा देउवाकै हातमा रहेको बताए।
‘पार्टीको परम्परामा सभापतिले नै उद्घाटन गर्ने चलन थियो। उहाँ (देउवा)बाटै उद्घाटन गरौँ भन्ने हाम्रो इच्छा हो, त्यो इच्छा अनुरोधका रूपमा छ। उहाँले के गर्ने भन्ने कुरा उहाँको व्यक्तिगत कुरा रह्यो,’ प्रवक्ता चालिसेले भने।
