। सभामुख डोलप्रसाद अर्यालले संसद् कमजोर भएको महसुस आफूले पटक्कै नगरेको बताएका छन् ।
संसद्को बर्खे (बजेट) अधिवेशन समानपनको सन्दर्भमा पत्रकारहरूसँगको अन्तरक्रियामा उनले यस्तो बताएका हुन् ।
तीन वर्ष प्रतिनिधिसभा सदस्य भएर विगतमा अनुभव लिएको र त्योभन्दा अगाडि समेत आफूले संसद् र संसदीय गतिविधिबारे चासो राख्ने गरेको उनले स्रमरण गरे ।
अनि अहिले आफैंले सभाको नेतृत्व गरिरहेको उल्लेख गर्दै उनले आफूले नेतृत्व गरेक रुपमा नभएर विगतको तुलना गर्दा समेत यसपटक कमजोर भयो भन्ने महसुस गर्ने अवस्था नरहेको बताएका हुन् ।
संसद्को मर्यादा, यसको काम गर्ने गति र जनताप्रतिको उत्तरदायित्वमा कुनै कमी नआएको उनको भनाइ छ ।
‘संसद् कमजोर भएको महसुस मैले गरेको पटक्कै छैन । विगतमा तीन वर्ष मैले पनि सभामा सदस्य भएर काम गरेँ । मैले नागरिकको हैसियतले राजनीतिमा प्रवेश गर्नुभन्दा अगाडि पनि नेपालको संसद् हेरिरहेकै हो,’ उनले भने ।
करिब तीन करोड नेपालीका लागि काम गर्न आएको उल्लेख गर्दै उनले काम गर्दा थकान हुनु स्वाभाविक भए पनि त्यसले संसद्को भूमिकालाई कुनै असर नपार्ने बताए ।
संसद्को काम कारबाही र सरकारको डेलिभरीका विषयमा बोल्दै सभामुख अर्यालले कार्यपालिकालाई उत्तरदायी बनाउनु र झक्झक्याउनु सांसद, नागरिक तथा पत्रकार सबैको साझा जिम्मेवारी भएको बताए ।
बरु संसद्मा नयाँ अभ्यास भएको दाबी गरे ।
अघिल्ला अभ्यासहरूभन्दा फरक यस पटकको संसद्मा सत्ता पक्ष र प्रतिपक्ष दुवैले जनजीविका र महत्त्वपूर्ण मुद्दाहरूमा केन्द्रित भएर घनिभूत छलफल गरेको उनले बताए ।
शीर्ष नेताहरूलाई रोस्ट्रमबाटै जनताका आवाज उठाउन महिनामा दुई पटक समय उपलब्ध गराइएको स्मरण गरे ।
यस्ता नयाँ अभ्यासले सदनलाई थप प्रभावकारी बनाएको उनको भनाइ थियो ।
साथै, सभामुख अर्याल अन्तरव्यवस्थापकीय संघ (आईपीयू) को सभामा नेपालको तर्फबाट सहभागी हुँदैछन् ।
उक्त मञ्चमा जलवायु परिवर्तनले पारेको असर र क्षतिपूर्तिसम्बन्धी विषयलाई ‘इमर्जेन्सी एजेन्डा’का रूपमा पेस गर्न लागिएको जानकारी दिए । उक्त प्रस्तावका लागि झन्डै ५० देशको समर्थन प्राप्त भइसकेको र करिब २८ वटा ‘साइडलाइन’ बैठकहरूको तयारी भइरहेको उनले बताए ।
आफ्नो कार्यकालमा कूटनीतिक नियोगका बैठकहरू तथा अन्तर्राष्ट्रिय मञ्चहरूमा मातृभाषा (नेपाली) लाई विशेष प्राथमिकता दिएर प्रयोग गर्दै आएको र यसले नेपालको पहिचानलाई बलियो बनाएको अनुभव पनि उनले सुनाए ।
पत्रकारहरूले निर्माणधिन संसद्को विषय उठाएका थिए ।
जवाफमा सभामुख अर्यालले साथै, संघीय संसद्को नयाँ भवन निर्माणमा देखिएको ढिलाइप्रति सचेत गराउँदै आगामी संसद्का बैठकहरू नयाँ भवनबाटै सञ्चालन हुनेमा आफू ढुक्क रहेको उनले बताए ।
