। पोखरा भ्रमणमा आएको भुटान पुरुष क्रिकेट टोलीले चारवटै अभ्यास खेलमा पराजित भएको छ । पोखरा रंगशालास्थित क्रिकेट मैदानमा शुक्रबार भएको आफ्नो चौथो अभ्यास खेलमा भुटान क्यान–११ सँग १०४ रनले पराजित भयो । योसँगै भुटान सबै अभ्यास खेलमा पराजित हुन पुग्यो ।
क्यान–११ ले दिएको १७७ रनको लक्ष्य पछ्याएको भुटानले १७ ओभर ३ बलमा ७२ रनमा समेटियो । भुटानलाई सस्तोमा समेट्न क्यान–११ का विपिन शर्मा एक्लैले ५ विकेट लिए । ४ ओभरमा विपिनले ७ रन खर्चेर ५ विकेट लिएका हुन् । आकाश चन्दले २, रसिद खान, प्रकाश जैशी र कप्तान विपिन खत्रीले एकएक विकेट लिए ।
ब्याटिङमा भुटानका सोनाम चोपेल, टाशी फुन्त्शो र आनन्द दोर्जीले समान १५ रन बनाए । नाम्गे थिन्ले १३, रञ्जुङ मिक्यो दोर्जी १ र छिरिङ टाशी ६ रन बनाएर आउट हुँदा सोनाम येशे २ रनमा अविजित रहे । तेञ्जिन राब्गे, नाम्गाङ चोजय, गकुल कुमार घाले र कर्मा दोर्जीले कुनै पनि रन जोड्न सकेनन् ।
त्यसअघि टस हारेर पहिला ब्याटिङ थालेको क्यान–११ ले निर्धारित २० ओभरमा ७ विकेट गुमाएर १७६ रन बनाएको थियो । क्यान–११ का लागि ओपनर तृतराज दासले अर्धशतक बनाए ।
उनले ३१ बलमा ५१ रन बनाए । मयन यादव २६, वंश क्षेत्री ४, सिब्रिन श्रेष्ठ १९, रसिद खान २४ र प्रकाश जैशी ४ रनमा आउट हुँदा कप्तान विपिन खत्री ३८ र युवराज खत्री एक रनमा अविजित रहे ।
दीपक कुमार डुम्रेले कुनै पनि रन जोेड्न सकेनन् । बलिङमा भुटानका आनन्दले ३, गकुलले २, सोनाम येशे र नाम्गे थिन्लेले एकएक विकेट लिए ।
अब भुटान अक्टोबर ५ बाट सुरु हुने आईसीसी टी–२० विश्वकप एसिया उप–क्षेत्रीय छनोट ‘ए’ खेल्न मलेसिया जानेछ ।
