एल्डरसट। बाँसुरीको मधुर धुनसँगै आठ कविले दुई दर्जनभन्दा बढी कविता वाचन गर्दै बेलायतको एल्डरसटमा तेस्रो काव्य-सन्ध्या सम्पन्न गरेका छन्।साहित्य सङ्गालो बेलायतको आयोजनामा शनिबार भएको कार्यक्रममा शशी थापा सुब्बाको कविता वाचनबाट कार्यक्रम सुरु भएको थियो।
त्यसपछि राज श्रेष्ठ, आरएल श्रमजीवी, विजय हितान, जयालक्ष्मी राई, चिम्खोले काइँला, मूलवीर राई र मुकुल दाहालले आ-आफ्ना तीन-तीनवटा कविता प्रस्तुत गरेका थिए।
कार्यक्रममा वाचन गरिएका अधिकांश कवितामा प्रवासी जीवनका अनुभव, संघर्ष र पीडासँगै सामाजिक विषय तथा प्रकृतिमाथि भइरहेको दोहनका प्रसङ्ग समेटिएका थिए। राज श्रेष्ठ, आरएल श्रमजीवी र विजय हितानले रसुवामा आएको बाढीलाई केन्द्रमा राखेर लेखिएका आफ्ना नयाँ कविता सुनाएका थिए।
कवि नरेश काङमाङ राईले सहजीकरण गरेको कार्यक्रममा बीच-बीचमा चर्चित नेपाली कविताका हरफसमेत वाचन गरिएको थियो। कवितासँगै पूर्ण सुनुवारको बाँसुरीको प्रस्तुतिले कार्यक्रमलाई थप सांगीतिक र भावपूर्ण बनाएको थियो।
सन् २०२४ देखि हरेक वर्ष आयोजना हुँदै आएको काव्य-सन्ध्यामा औपचारिक समारोहभन्दा कविता वाचनलाई प्राथमिकता दिइँदै आएको आयोजकले जनाएको छ।कार्यक्रमको संयोजन साहित्यकार केदार सङ्केतले गर्दै आएका छन्। खुपेन सुनुवार, निर्भीकजंग रायमाझी, नरेश काङमाङ राई, प्रयास दुमी राई र जीवन तिवारीलगायत युवा लेखक आयोजक समूहमा आबद्ध छन्।
काव्य-सन्ध्याको अवसरमा ‘नेपाल क्राफ्ट एन्ड बुक डटकम’ले नेपाली साहित्य तथा संस्कृतिसम्बन्धी पुस्तकहरूको प्रदर्शनीसमेत गरेको थियो।कार्यक्रममा करिब एक सय जनाको सहभागिता रहेको आयोजकले जनाएको छ।
