। पुराना वामपन्थी नेता घनेन्द्र बस्नेतको निधन भएको छ । क्यान्सरपीडित बस्नेतको बुधबार निधन भएको हो ।
उनी एमालेका तर्फबाट दुई पटक प्रतिनिधिसभा सदस्यमा निर्वाचित भएका थिए । बस्नेत २०४८ को आमनिर्वाचनमा संखुवासभा–२ र २०५६ मा भोजपुर–१ बाट निर्वाचित भएका थिए ।
बस्नेतको निधनमा एमाले अध्यक्ष केपी शर्मा ओलीले पनि दु:ख व्यक्त गरेका छन् ।
‘झापा आन्दोलनका योद्धा कमरेड घनेन्द्र बस्नेत हामीबीच नरहनु भएको दु:खद खबर सुनेँ,’ उनले लेखेका छन्, ‘नेपालको कम्युनिस्ट आन्दोलन र लोकतान्त्रिक आन्दोलनमा उहाँको योगदान अविष्मरणीय छ ।’
ओलीले अगाडि लेखेका छन्, ‘लामो जेल जीवन र यातनाका अनेकौं शृङ्खला पार गरेर आजको समाजले उपभोग गरिरहेको लोकतान्त्रिक अधिकार प्राप्त भएको हो । म ती कष्टपूर्ण दिनहरू सम्झिरहेको छु ।’
उनले बस्नेतप्रति भावपूर्ण श्रद्धाञ्जली व्यक्त गर्दै उनको सङ्घर्ष र योगदान नेपालको कम्युनिस्ट तथा लोकतान्त्रिक आन्दोलनको इतिहासमा सधैँ सम्मानपूर्वक सम्झना भइरहने बताएका छन् ।
२००९ साल असोज २५ मा जन्मिएका बस्नेतले झापा आन्दोलनमा संलग्न भएर आफूलाई राजनीतिमा समाहित गरेका थिए । पछिल्लो समय एमाले विभाजन हुँदा उनी माधवकुमार नेपालसँगै लागेर नेकपा एकीकृत समाजवादीको उपाध्यक्ष बनेका थिए ।
एकीकृत समाजवादी र माओवादी केन्द्र एकता हुँदा भने उनी घनश्याम भुसालसँगै नेकपा संयुक्तमा लागेका थिए ।
उनको भोलि पशुपति आर्यघाटमा अन्त्येष्टि हुने नेकपा संयुक्तका कार्यवाहक अध्यक्ष घनश्याम भुसालले जानकारी दिए । अन्त्येष्टिअघि आर्यघाटमै शोकसभा हुने उनले बताए ।
