— म्यान्मारको राखाइन राज्यस्थित एक व्यस्त बजारमा सेनाले गरेको हवाई आक्रमणमा परी मृत्यु हुनेको संख्या ५० पुगेको छ । सोमबार मध्याह्न सेनाले क्याउक्ताव शहर नजिककैको नदी किनारस्थित एक बजारमा दुईवटा बम खसालेको थियो ।

उक्त आक्रमणपछि घटनास्थलमा खटिएका दुई स्थानीय राहतकर्मीले मंगलबार कम्तिमा ५० जनाको मृत्यु भएको पुष्टी गरेका छन् । राहतकर्मी वाइ हुन आउङले भने, ‘मृत्यु हुनेको संख्या ५० पुगेको छ र ५८ जना घाइते भएका छन् ।’

बमबारीपछिको भीषण आगलागीमा केही शवहरू जलेर नष्ट भएका कारण मृतकको अन्तिम संख्या अझै बढ्न सक्ने उनले चेतावनी दिएका छन् ।

सुरक्षाको कारण नाम नबताउने शर्तमा अर्का एक स्थानीय स्वयम्सेवकले पनि मृतकको संख्या ५० नै पुगेको पुष्टि गरेका छन् ।

उक्त क्षेत्रलाई नियन्त्रणमा राखेको स्थानीय जातीय विद्रोही समूह ‘अराकान आर्मी’ ले मंगलबार यसअघि नै मृतकको संख्या ४९ पुगेको र ५८ जना घाइते भएको जनाएको थियो । घाइतेमध्ये २२ जनाको अवस्था गम्भीर रहेको बताइएको छ । मारिनेहरूमा निर्दोष बटुवाहरू, बजारका व्यापारीहरू, खरिदकर्ताहरू र सामान बोक्ने मजदुरहरू रहेको अराकान आर्मीले जारी गरेको विज्ञप्तिमा उल्लेख छ ।

ads/1440x233px-ekantipur-27820260835-0692026083347.jpg
सन् २०२१ मा आङ सान सुकीको निर्वाचित सरकारलाई अपदस्थ गरेर सेनाले शासनसत्ता हातमा लिएपछि म्यान्मार गृहयुद्ध चर्कदैं गएको छ । गृहयुद्धमा १ लाखभन्दा धेरै मानिसहरुले ज्यान गुमाइसकेका छन् ।

द्वन्द्वमा परी १ लाखभन्दा बढी मानिसको मृत्यु भइसकेको छ। सोमबार बमबारी भएको उक्त बजार र त्यहाँको नजिकैको पुल व्यापारिक गतिविधिको केन्द्र थियो ।

यस नदी हुँदै भारततर्फ सीमापार व्यापार हुने गरेको थियो । म्यान्मारमा जारी गृहयुद्धमा राखाइन राज्यले युद्धमा सबैभन्दा दयनीय अवस्था भोग्दै आएको छ ।