: चिनियाँ राष्ट्रपति सी जिनपिङले आफ्नो अमेरिका भ्रमणका क्रममा ताइवानको मुद्दामा अमेरिकाले सही र स्पष्ट अडान लिनुपर्ने बताएका छन्।
चीनको सरकारी समाचार संस्था 'सिन्ह्वा'का अनुसार राष्ट्रपति सीले अमेरिकाले 'ताइवानको स्वतन्त्रताको विरोध गर्ने' आफ्नो प्रतिबद्धतामा दृढ रहनुपर्ने आशा व्यक्त गरेका छन्।
द्विपक्षीय रणनीतिक सहयोग र चीन-अमेरिका सम्बन्धलाई मजबुत बनाउनका लागि ताइवान मुद्दा लाई अत्यन्त सावधानीपूर्वक सम्हाल्न चिनियाँ राष्ट्रपतिले अमेरिकासँग आग्रह गरेका छन्। उनले भने, 'चीनको राष्ट्रिय एकता र क्षेत्रीय अखण्डताको रक्षा गर्ने विषयमा हाम्रो स्थिति पूर्ण रूपमा स्पष्ट छ।'
चीनले स्वशासित ताइवानलाई आफ्नै भूभागको रूपमा दाबी गर्दै आएको छ भने ताइवानले आफूलाई चीनभन्दा पृथक् मान्दछ। पछिल्लो समय बेइजिङले ताइवानमाझ अलगाववादी गतिविधिको संज्ञा दिँदै सैन्य तथा राजनीतिक दबाब बढाउँदै लगेको छ।
उता अमेरिका र ताइवानबीच औपचारिक कूटनीतिक सम्बन्ध नभए तापनि अमेरिकी कानुनअनुसार ताइवानलाई आत्मरक्षाका लागि आवश्यक सहयोग उपलब्ध गराउन अमेरिका बाध्य छ। यसै कारण अमेरिकाले ताइवानसँगको सम्बन्ध र चीनसँगको कूटनीतिक सन्तुलन कायम राख्न निरन्तर चुनौतीको सामना गरिरहेको छ।
करिब एक दशकपछि भएको राष्ट्रपति सीको यो अमेरिका भ्रमण, राष्ट्रपति डोनाल्ड ट्रम्पको दोस्रो कार्यकाल सुरु भएयता दुई नेताबीचको तेस्रो भेटघाट हो।
