। नेपालस्थित अस्ट्रेलियाली दूतावासले अस्ट्रेलिया जान चाहने नेपाली नागरिकहरूलाई भिसासम्बन्धी ठगी र दलालहरूको झुटा आश्वासनबाट सावधान रहन आग्रह गरेको छ।
दूतावासले शतप्रतिशत भिसा ग्यारेन्टी गर्ने, मोटो रकम अग्रिम माग्ने, पर्यटक भिसामा पनि काम गर्न पाइने वा अस्ट्रेलिया पुगेपछि सजिलै अर्को भिसामा परिणत गर्न सकिने जस्ता प्रलोभन देखाउने एजेन्टहरूदेखि सचेत रहन चेतावनी दिएको छ।
यस्ता प्रलोभन र झुटा आश्वासनमा पर्दा ठूलो आर्थिक नोक्सानी व्यहोर्नुपर्ने मात्र नभई व्यक्तिगत विवरण चोरी हुने र अस्ट्रेलिया पुगेर गैरकानुनी रूपमा काम गर्न बाध्य पारिने जोखिमसमेत रहने दूतावासले प्रस्ट पारेको छ।
भिसासम्बन्धी आधिकारिक र तथ्यपूर्ण जानकारीका लागि अस्ट्रेलियाको गृह मामिला विभागको आधिकारिक वेबसाइट मात्र प्रयोग गर्न दूतावासले सुझाएको छ।
साथै, अध्यागमनसम्बन्धी सहायता आवश्यक परेमा दर्ता भएका आधिकारिक माइग्रेसन एजेन्टमार्फत मात्र काम गर्न सल्लाह दिइएको छ।
त्यस्तै, भिसा आवेदनका क्रममा गलत विवरण वा नक्कली कागजात पेस गरेमा भिसा रद्द हुने, भविष्यको भिसा आवेदनमा गम्भीर असर पर्ने, प्रतिबन्ध समेत लाग्न सक्ने र अन्य कडा कानुनी कारबाहीसमेत भोग्नुपर्ने चेतावनी दूतावासले दिएको छ।
के भन्छ दूतावास ?
अस्ट्रेलियाको भिसा शतप्रतिशत ग्यारेन्टी गर्ने र ठूलो रकम अग्रिम माग्ने दलालहरूबाट सावधान रहनुपर्छ। यस्ता ठगीमा पर्दा आर्थिक नोक्सानी हुने, व्यक्तिगत विवरण चोरी हुने र असुरक्षित श्रम शोषणमा पर्ने उच्च जोखिम हुन्छ।
अस्ट्रेलियाको भिसा प्रदान गर्ने एकमात्र आधिकारिक निकाय अस्ट्रेलिया सरकारको गृह मामिला विभाग मात्र हो।
पर्यटक वा ट्रान्जिट भिसामा अस्ट्रेलिया गएर काम गर्नु गैरकानुनी हो। यस्तो प्रयास गरेमा सिधै प्रवेश निषेध गरी स्वदेश फर्काइन्छ। विद्यार्थी भिसामा पनि काम गर्ने समयसीमा (घण्टा) तोकिएको हुन्छ।
भिसा आवेदनमा भरिने आफ्नो नाम, जन्ममिति, आपराधिक रेकर्ड लगायतका सम्पूर्ण विवरणको सत्यताको जिम्मेवारी स्वयम् आवेदकको हुन्छ। एजेन्टले झुटो विवरण वा नक्कली कागजात पेस गरेमा भिसा रद्द हुने, जरिवाना लाग्ने र भविष्यमा अन्य देशको भिसासमेत नपाउने गरी रेकर्ड बिग्रिन्छ।
सामाजिक सञ्जाल (ह्वाट्सएप वा फेसबुक) मार्फत सम्पर्क गर्ने, राहदानी माग्ने, आवेदनमा झुटो बोल्न लगाउने, इमी एकाउन्टको पहुँच नदिने र एमएआरएन दर्ता नम्बर नभएका एजेन्टहरू पूर्ण रूपमा ठग हुन्।
अस्ट्रेलिया पुगेपछि काम गर्न पाइन्छ भन्दै प्रोटेक्सन भिसाको दुरुपयोग नगर्न कडा चेतावनी दिइएको छ। यो भिसा वास्तविक शरणार्थीका लागि मात्र हो; नक्कली दाबी गरेमा छिट्टै अस्वीकृत हुने, आजीवन रेकर्ड बिग्रिने र जेल सजायसमेत हुन सक्ने जोखिम रहन्छ।
भिसासम्बन्धी सही जानकारीका लागि सरकारी वेबसाइट र ओएमएआरए (अफिस अफ माइग्रेसन एजेन्ट्स् रजिस्ट्रेसन अथोरिटी) मा दर्ता भएका आधिकारिक एजेन्टहरूको मात्र भर पर्न सुझाव दिइएको छ। अवैध जलमार्ग वा अन्य देश हुँदै लुकेर अस्ट्रेलिया प्रवेश गर्न खोज्नेलाई आजीवन प्रतिबन्ध लाग्नेछ।
