: चिनियाँ राष्ट्रपति सी जिनपिङ ११ वर्षको लामो अन्तरालपछि औपचारिक राज्यभ्रमणका क्रममा अमेरिका पुगेका छन्। अमेरिकी राष्ट्रपति डोनाल्ड ट्रम्पले सैन्य विमानस्थल 'जोइन्ट बेस एन्ड्र्युज' पुगेर सीलाई आफैं स्वागत गरेका छन्।
१९६२ पछि पहिलो पटक कुनै अमेरिकी राष्ट्रपतिले यस एयरबेसमा कुनै विदेशी नेताको व्यक्तिगत रूपमा स्वागत गरेका हुन्। विदेशी समकक्षीलाई स्वागत गर्न अमेरिकी राष्ट्रपति आफैं विमानस्थल पुग्नुलाई कूटनीतिक वृत्तमा विरलै मानिने उच्च सम्मानका रूपमा हेरिएको छ।
राष्ट्रपति सीको यो भ्रमण सन् २०१५ पछि पहिलो ह्वाइट हाउस भ्रमण हो। भ्रमणको मुख्य कार्यक्रमअनुसार आज राति ह्वाइट हाउसको 'इस्ट रुम'मा भव्य 'स्टेट डिनर' (राजकीय भोज) आयोजना गरिँदै छ। डिनरमा अमेरिकी प्रविधि तथा व्यापार क्षेत्रका शीर्ष उद्योगपतिहरू—इलोन मस्क, सुन्दर पिचाई, सत्य नाडेला, साम अल्टम्यान, टिम कुक र जेन्सन ह्वाङलगायतको उपस्थिति रहने जनाइएको छ।
ह्वाइट हाउसमा हुने दुई नेताबीचको द्विपक्षीय बैठकमा व्यापार तथा शुल्क (ट्यारिफ), आर्टिफिसियल इन्टेलिजेन्सको सुरक्षा तथा नियमन, दुर्लभ खनिजको आपूर्ति र ताइवान मामिला मुख्य एजेन्डाका रूपमा रहनेछन्।बितेका केही महिनायता दुई देशबीच जारी व्यापारिक तनाव कम गर्ने प्रयास भइरहेको पृष्ठभूमिमा यो भ्रमणलाई विश्वभर चासोका साथ हेरिएको छ।
