: व्यावसायिक भिसा लिएर उद्देश्यविपरीत काममा संलग्न भएको पाइएपछि ८८ जना चिनियाँ नागरिकको भिसा रद्द गरिएको छ। उनीहरूलाई जरिवाना गराई निष्कासनको प्रक्रिया अघि बढाइएको छ।
स्रोतका अनुसार सिन्धुलीको मरिण गाउँपालिका-४, साहानस्थित जियान फुड्स प्रालिमा कार्यरत उनीहरूले अन्य कम्पनीको नाममा व्यावसायिक भिसा लिई काम गरेको पाइएको हो।
चीनमा प्रशोधित भैँसीको मासु निर्यात गर्ने परियोजनाअन्तर्गत निर्माणाधीन उक्त उद्योगमा चीनको छेङ्दु तियान फुड लिमिटेडको आर्थिक साझेदारी रहेको छ।
अध्यागमन विभागले सम्बन्धित निकायसँगको समन्वयमा गरेको पछिल्लो अनुगमनका क्रममा केही विदेशी नागरिक व्यावसायिक भिसा सिफारिस तथा स्वीकृतिसँग सम्बन्धित व्यवसाय वा लगानीको उद्देश्यभन्दा फरक प्रकृतिका रोजगारी, श्रम तथा अन्य कार्यमा संलग्न रहेको पाएको जनाएको छ।
भिसाको उद्देश्यविपरीत काम गरेको पाइएपछि उनीहरूको व्यावसायिक भिसा रद्द गरिएको अध्यागमन स्रोतको भनाइ छ। उनीहरूलाई अध्यागमन ऐन, २०४९ बमोजिम जरिवाना गरी निष्कासनको प्रक्रिया अघि बढाइएको हो।
अध्यागमन नियमावली, २०५१ अनुसार व्यावसायिक भिसा प्राप्त गरेका विदेशी नागरिकले जुन उद्देश्यका लागि भिसा लिएका हुन्, सोही उद्देश्यअनुसार नेपालमा बस्नुपर्ने व्यवस्था छ। यस्तो भिसा रोजगारी, श्रम वा अन्य असम्बन्धित कार्यका लागि प्रयोग गर्न पाइँदैन।
सबै विदेशी नागरिकलाई आफूले प्राप्त गरेको भिसाको उद्देश्य र सर्तअनुसारका गतिविधिमा मात्र संलग्न हुन विभागले अनुरोध गर्दै आएको छ। सम्बन्धित उद्योग, कम्पनी, प्रतिष्ठान तथा रोजगारदातालाई उपयुक्त भिसा र स्वीकृतिबिना विदेशी नागरिकलाई रोजगारीमा नलगाउन निर्देशन पनि दिँदै आएको छ।
अन्नपूर्णपोस्ट डटकमले यसअघि मासु प्रशोधन उद्योगमा सयौं चिनियाँ नागरिकले भिसाको दुरुपयोग गर्दै काम गरिरहेको खुलासा गरेको थियो। निर्माणाधीन उद्योगमा ५०१ जना चिनियाँ नागरिक कार्यरत रहेकोमा अधिकांशले भिसाको दुरुपयोग गरी काम गरिरहेको पाइएको थियो। सिन्धुली प्रशासनले अनुगमन गर्दा भिसाको दुरुपयोग गरी काम गरेको, कोहीको राहदानीसमेत नभएको पाइएको थियो।
