: नेपाली कम्युनिस्ट पार्टी(नेकपा)ले कम्युनिस्ट घटकहरुसँग पार्टी एकताको पहल गर्न वार्ता समिति गठन गरेको छ।
पार्टी कार्यालय पेरिसडाँडामा बसेको केन्द्रीय कार्यसंयोजन समितिको बैठकले तीन सदस्यीय वार्ता समिति गठन गरेको नेकपा प्रवक्ता प्रकाश ज्वालाले जानकारी दिए। समितिमा समितिमा प्रकाश ज्वाला, देव गुरुङ र गंगानारायण श्रेष्ठ रहेका छन्। वार्ता समितिले बुधबारबाट नै काम सुरु गर्ने र विप्लव समूहबाट विभाजित नेपाल कम्युनिस्ट पार्टी, एमाले लगायतका सम्पूर्ण वामपन्थी दलहरूसँग संवाद र वार्ता अगाडि बढाउने प्रवक्ता ज्वालाको भनाइ छ।
त्यस्तै बैठकले आगामी असोज १५ देखि मंसिर १५ गतेसम्म देशव्यापी दुई महिने राष्ट्रिय जनअभियान सञ्चालन गर्ने निर्णय गरेको छ। केन्द्रदेखि वडा, टोल र जनताको घरदैलोसम्मपुग्ने गरी अभियान चलाइने र यसको विस्तृत कार्यविधि दसैँअगाडि बस्ने सचिवालय बैठकले पारित गर्ने उनले जानकारी दिए। साथै बैठकले बाढी पीडितको उद्धार, राहत, पुनस्र्थापना र पुनर्निर्माणमा पार्टीका तर्फबाट सहयोग गर्न पहिले नै गठित समन्वय समितिलाई जिम्मेवारी दिएको छ। दुई महिने अभियानपछि आवश्यकता अनुसार संसद् र सडक दुवै मोर्चाबाट जनजीविका र राष्ट्रिय स्वाधीनताका मुद्दामा आन्दोलनका कार्यक्रम अघि बढाइने समेत निर्णय भएको छ।
बैठकमा पार्टी संयोजकपुष्पकमल दाहाल ‘प्रचण्ड’ र सहसंयोजक माधवकुमार नेपालले वर्तमान राष्ट्रिय राजनीति, राष्ट्रिय स्वाधीनता, संविधान र लोकतान्त्रिक गणतन्त्रमाथि देखिएका चुनौतीबारे बैठकमा ब्रिफिङ गरेका थिए।
