चीनले इरानी एयरलाइन्समाथि अमेरिकाले लगाएको प्रतिबन्धलाई अवैध भनेको छ ।
चिनियाँ विदेश मन्त्रालयका प्रवक्ता गुओ जियाकुनले पत्रकार सम्मेलनमा उक्त प्रतिबन्धलाई अवैध भनेका हुन् ।
‘चीनले सधैं अन्तर्राष्ट्रिय कानुनी आधार वा संयुक्त राष्ट्र सुरक्षा परिषद्को स्वीकृति नभएका एकपक्षीय प्रतिबन्धहरूको विरोध गर्दै आएको छ,’ जियाकुनले भने ।
यो भनाइ अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच यही साता बैठक हुन लागेको समयमा आएको हो ।
अमेरिकी अर्थमन्त्री स्कट बेसन्टले सेप्टेम्बर २३ देखि इरानी एयरलाइन्सका लागि विश्वको हवाई क्षेत्र बन्द हुने बताएका छन् ।
उनले इरानी एयरलाइन्ससँग कुनै पनि प्रकारको सहकार्य गरेमा प्रतिबन्ध लगाउन सकिने चेतावनीसमेत दिएका छन् ।
बेसन्टले पछिल्ला दिनमा इरानमाथि प्रतिबन्ध लगाउने विषयमा चीनका उपप्रधानमन्त्रीसँग छलफल गरेका थिए । उनका अनुसार ट्रम्प र सी चिनफिङबीच हुने बैठकमा पनि इरानमाथिका प्रतिबन्धको विषयमा छलफल हुन सक्नेछ ।
