। राष्ट्रिय स्वतन्त्र पार्टी(रास्वपा)की सांसद रचना खतिवडाले आफू जेनजी आन्दोलनका शहीद, घाइते, अपांगता भएकाहरूको आवाज उठाउन सांसद भएको बताएकी छन् । मंगलबारको प्रतिनिधिसभा बैठकमा बोल्दै उनले यस्तो बताएकी हुन् ।

‘आज यो गरिमामय सदनमा उभिनु मेरो लागि कुनै राजनीतिक रहर या पदको लालच थिएन । यो मेरो न्याय र खोज्ने यात्रा थियो’, सांसद खतिवडाले भनिन्, ‘मेरो कोखमा ९ महिना हुर्किएको ताते–ताते गर्दै मेरा आँखासामु नै बढेको मेरो मुटुको टुक्रा त्यतिबेलाको शासकले चलाएको तातो गोली र उसको बगेको रगतले न्याय खोज्दै थियो ।’

खतिवडा शहीदकी आमा हुन् । गत वर्षको २३ भदौमा जेनजी आन्दोलनमा उनले छोरा गुमाएकी थिइन् ।

उक्त आन्दोलनपछि बदलिएको परिस्थितिमा २१ फागुन २०८२ मा प्रतिनिधिसभाको निर्वाचन भयो ।

निर्वाचनको समयमा रास्वपा आफ्नो घरमा पुगेको स्मरण गर्दै उनले भनिन्, ‘सम्माननीय प्रधानमन्त्रीज्युले बारम्बार आग्रह गरेर म यो पदमा आएकी थिएँ । अन्य तमाम जेनजीहरूको सन्तानहरूको बलिदान खेर जान नदिन म यो सदनमा पुगेकी हुँ ।’

देशमा परिवर्तन आएपछि पनि यदि सरकारले बाटो बिराउँछ खोज्छ भने संसद्को रोस्ट्रममा एउटी शहीदकी आमाले निरन्तर खबरदारी गर्नुपर्ने र यही गर्न आफू संसद्मा आएको उनले बताइन् ।

‘मेरो यो यात्राको उद्देश्य शासकहरूले आफ्नो गलत बाटो समयमै सुधारुन भनेर हो । म आज यो रोस्ट्रमबाट स्पष्ट पार्न चाहन्छु, जुन दिन जेनजी आन्दोलनका शहीदहरूले पूर्ण रूपमा न्याय पाउँछन्, त्यस दिन यो सांसद पदबाट राजीनामा दिन मलाई १ सेकेन्ड पनि हिच्किचाहट हुनेछैन’, उनले भनिन्, ‘तर विडम्बना मेरो यो पवित्र उद्देश्य र छातीको घाउलाई कसैले छोरोको लासमाथि सांसद पद साटेकी भन्दै अपमानजनक टिप्पणी गरेको सुन्दा म स्तब्ध छु ।’

आफ्नो छातीको पीडामाथि कसैको भाग खोस्न आएजस्तो गरी राजनीतिक आक्रमण गरेको उनले आरोप लगाइन् । उनले भनिन्, ‘मैले सिधा प्रश्न गर्न चाहन्छु– तपाईंहरूको छोराछोरी तपाईंहरूसँग छन् । उनीहरू हाँस्छन्, खेल्छन् भविष्य देख्न पाउनुहुन्छ । तर मेरो संसार उजाडिएको छ । मेरो काख रित्तिएको छ । यो ठाउँमा उभिएर तपाईंहरू एकचोटी हेरिदिनुस् ।’

कसैले आफ्नो छोरो जिउँदो ल्याएर काखमा राखिदिन्छ भने सांसद पद त्याग्न तयार रहेको उनले बताइन् । ‘त्यसैले आरोप लगाउनुअघि छोराको लाससँग पद साट्न आएकी भन्ने मर्यादाहीन अपशब्द बोल्नु अघि हजार पटक सोचिदिनुस् । एउटा आमाको ममता र पीडामाथि प्रहार गर्ने दुस्साहस नगरिदिनुस्’, उनले भनिन् ।

सरकारसँग आफ्ना थुप्रै असहमति रहेको, तर जिम्मेवार भएर बोल्ने बताइन् ।

‘मेरो पनि थुप्रै प्रश्नहरू छन्, अहिलेको सरकारसँग मेरो पनि थुप्रै असहमति पनि छन् । तर, म जिम्मेवार भएर बोल्छु, जिम्मेवार भएर बोल्छु’, उनले भनिन् ।

उनले शहीदकी आमामाथि अपमान हुँदा सरकार के हेरेर बसेको छ ? भन्दै प्रश्न गरिन् । ‘एउटी शहीदको आमाको यत्रो अपमान हुँदा यो सरकार के हेरेर बसेको छ ? आफ्नो छोराहरूको रगत अझै पनि सुकेका छैनन्,’ उनले भनिन् ।