: नेपाल–चीन सीमा क्षेत्रमा देखिएका समस्या र सम्भावित जोखिमबारे ताक्लाकोटमा भएको अनौपचारिक छलफलपछि हुम्लाको टोली स्वदेश फर्किएको छ।
चार दिनसम्म चलेको छलफलमा हिमतालबाट हुन सक्ने विपद्को जोखिम न्यूनीकरणदेखि सीमा व्यापार, आवागमन र सीमाक्षेत्रका नागरिकका समस्या समाधानसम्मका विषयमा दुई पक्षबीच छलफल भएको हो।
चीनतर्फ रहेका पाँच वटा हिमतालको प्राविधिक अध्ययन गरी सक्ने सम्भावित जोखिमको अवस्था पहिचान गर्ने विषय छलफलको महत्वपूर्ण एजेन्डा बनेको हुम्लाका प्रमुख जिल्ला अधिकारी भोलानाथ गुरागाईंले बताए। जोखिम न्यूनीकरणका लागि दुवै देशका स्थानीय अधिकारीले आ–आफ्ना संघीय सरकारसँग आवश्यक पहल गर्ने विषयमा छलफल भएको उनको भनाइ छ।
रसुवाको भोटेकोशी आएको बाढीबाट भएको क्षतिपछि हिमतालबाट उत्पन्न हुन सक्ने जोखिमप्रति चिनियाँ पक्षले चासो देखाएको थियो। त्यसैलाई आधार बनाएर ताक्लाकोटका स्थानीय अधिकारीको पहलमा हिमताल तथा विपद् जोखिमबारे छलफल गरिएको हो।छलफलमा नेपाली पक्षले हिल्सा क्षेत्रमा देखिँदै आएका सीमा तथा व्यापारसम्बन्धी समस्या पनि उठाएको थियो। सीमा स्तम्भको व्यवस्थापन, नियमित सूचना आदान–प्रदानका लागि संयन्त्र निर्माण, हिल्सास्थित मितेरी पुल सञ्चालन तथा हिल्सा–सिमकोट सडक स्तरोन्नतिका विषय नेपाली पक्षले प्राथमिकताका साथ राखेको थियो।
त्यस्तै, अवैध वस्तुको आयात–निर्यात नियन्त्रणसँगै कृषि तथा पशुजन्य वस्तुको निर्यात सहजीकरण, सीमापासको व्यवस्था र व्यापार मेला सञ्चालनका विषयमा पनि छलफल भएको प्रमुख जिल्ला अधिकारी गुरागाईंले जानकारी दिए। सीमावर्ती नेपाली नागरिकलाई ताक्लाकोटमा उपचारको सुविधा उपलब्ध गराउने तथा सीमाक्षेत्रमा हुने गतिविधिबारे नियमित समन्वय गर्ने विषयसमेत नेपाली पक्षले राखेको थियो। आगामी वर्ष ताक्लाकोटका स्थानीय अधिकारीलाई हुम्ला भ्रमणका लागि निमन्त्रणा गरिएको छ ।
नेपाली पक्षबाट उठाइएका स्थानीयस्तरबाटै समाधान गर्न सकिने विषय तत्काल कार्यान्वयन गर्ने र केन्द्रबाट निर्णय आवश्यक पर्ने विषय सम्बन्धित माथिल्लो निकायमा पठाउने प्रतिबद्धता चिनियाँ पक्षले जनाएको प्रजिअ गुरागाईंले बताए। नेपाल–चीन सीमावर्ती क्षेत्रबीच सुरक्षा, विपद् व्यवस्थापन, व्यापार तथा नागरिक आवागमनका विषयमा स्थानीयस्तरमै संवाद र समन्वय बढाउने प्रयासका रूपमा यो छलफललाई हेरिएको छ ।
चिनियाँ सरकारको निमन्त्रणामा सेप्टेम्बर १४ देखि १७ तारिखसम्म पुलान काउन्टीमा भएको छलफलमा हुम्लाका प्रमुख जिल्ला अधिकारी भोलानाथ गुरागाईं, जिल्ला प्रहरी कार्यालयका प्रहरी नायब उपरीक्षक शंकर खड्का, सशस्त्र प्रहरी बलका प्रहरी नायब निरीक्षक नन्दबहादुर साउद र नाम्खा गाउँपालिकाका अध्यक्ष प्रेमबहादुर लामा सहभागी हुनुभएको थियो ।
