: नेकपा एमालेका अध्यक्ष केपी शर्मा ओलीले पत्रकारलाई प्रश्न सोध्दा पत्रकारिताको मर्यादा र अभ्यास पालना गर्न सुझाव दिएका छन्। आइतबार पार्टी केन्द्रीय कार्यालय च्यासलबाट बाहिरिने क्रममा सञ्चारकर्मीसँग कुरा गर्दै अध्यक्ष ओलीले प्रश्न सोध्नुअघि अनुमति लिनुपर्ने र समाचार प्रकाशित गर्नुअघि सम्बन्धित व्यक्तिसँग सोध्नुपर्ने बताए।
‘पत्रकारिताको के नियम हुन्छ भने,तपाईँसँग प्रश्न सोध्न सक्छु भनेर प्रश्न सोधिन्छ। प्रश्न सोधिसकेपछि त्यसलाई प्रकाशित गर्नुअघि प्रकाशित गरौँ भनेर सोधिन्छ,’उनले भने, ‘तपाईंहरूले बुम ल्याएर थुतुनोमा घोच्नुहुन्छ। त्यस्तो नगर्नुहोस्।’
आइतबार बिहान नेकपा एमालेले निर्वाचन समीक्षा तथा पार्टी पुनर्गठन कार्यदलको बैठक बोलाएको थियो। बैठकपछि बाहिरिने क्रममा सञ्चारकर्मीले सचिवालय बैठक स्थगित भएको हो भन्दै प्रश्न गरेका थिए। त्यसको जवाफ दिनुको सट्टा ओलीले पत्रकारिताको अभ्यास सिकाएका हुन्।
