। नेपाली कम्युनिस्ट पार्टी(नेकपा)का नेता डा. भीम रावलले नेतृत्वमा पदमोह र कम्युनिस्ट आचरण नभएकाले नेपालको कम्युनिस्ट आन्दोलन कमजोर हुन पुगेको बताएका छन् ।
शनिबार पुष्पलाल मित्रता केन्द्रले बुटवलमा आयोजना गरेको कार्यक्रममा बोल्दै नेता रावलले यस्तो बताएका हुन् ।
उनले गत वर्षको जेनजी आन्दोलनपछि नेपालका कम्युनिस्ट पार्टीहरू निकै कमजोर अवस्थामा पुगेको बताउँदै नेतृत्वमा भएकाहरूले स–सम्मान बिदाइ लिएर नेतृत्व हस्तान्तरण गर्नुपर्ने पनि बताए ।
‘मानिस कति चोटी प्रधानमन्त्री भएपछि, कतिपटक अध्यक्ष र कति पैसा भएपछि सन्तुष्ट हुन्छ ?’ नेता रावलले प्रश्न गर्दै भने, ‘वैचारिक र संगठनात्मक रूपमा नेताहरू तपाईँहरूको योगदान, त्याग देखियो । अब स–सम्मान बिदाइ हुनुस् भनेर भन्नुपर्छ ।’
आफू वामपन्थी शक्ति बलियो बनाउने जस्तोसुकै प्रस्तावमा हस्ताक्षर गर्न पनि तयार रहेको उनले बताए ।
‘देश र जनता धारासायी भएर अस्तित्व नै संकटमा पर्दा पनि म र मेरो पद भनेर अर्कालाई चुप लगाउने काम भइरहेको छ । यसरी कम्युनिस्ट आन्दोलन बलियो हुँदैन,’ उनले भने ।
विगतमा नेकपा र त्यसपछि कम्युनिस्ट नेतृत्वका सरकारमा नेतृत्वकै अकर्मण्यताका कारण कम्युनिस्ट पार्टीप्रति जनताको विश्वास घटेको नेता रावलले टिप्पणी गरे ।
‘आज जनताले आफ्ना वास्तविक मुद्दा, आवाज र अवस्था सुधार्ने राजनीतिक शक्ति खोजेको छ’, रावलले भने, ‘अहिलेको सरकारले गरेका जनविरोधी र राष्ट्रघाती कामको भण्डाफोर गर्नुपर्ने बेला आएको छ । राष्ट्रिय अखण्डता र भौगोलिक रक्षाका लागि वामपन्थी शक्तिहरू उठ्नुपर्ने बेला आएको छ ।’
नेता रावलले अहिले नेपालको राष्ट्रियता र स्वाधिनता खतरामा रहेको पनि टिप्पणी गरे । ‘प्रधानमन्त्रीले सार्वभौम संसद्मा उभिएर नेपालले भारतको सीमा मिचेको छ भनेर अभिव्यक्ति दिनु, मुस्ताङको युरेनियम अमेरिका र अस्ट्रेलियामा डाटा सेन्टर स्थापनाका नाममा बुझाउनेजस्ता सम्झौता हुनुले गम्भीर खतरा उत्पन्न गराएको छ,’ उनले भने ।
यस्तो बेला वामपन्थी, देशभक्त शक्तिहरू एकजुट हुनुपर्ने नेता रावलले बताए । ‘त्यसैले अब आत्मसमीक्षा गर्दै मुलुक र जनताको दीर्घकालीन हितका लागि कम्युनिस्टहरूबीच वैचारिक एकता र सहकार्यको खाँचो देखिएको छ,’ नेता रावलले भने ।
