: कपिलवस्तु नगरपालिका–९ कुस्मास्थित बाणगंगा नदीमा फसेका तीन जनाको सशस्त्र प्रहरीले सकुशल उद्धार गरेको छ।
घाँस–दाउराका लागि नदीपारि गएका उनीहरू नदीमा अचानक बाढी आएपछि बीचमै फसेका थिए। नदीको बहाव बढेपछि उनीहरू जोखिममा परेका थिए। उद्धार गरिनेमा स्थानीय ६० वर्षीया दुर्गादेवी ज्ञवाली, ३२ वर्षीया तुलसा ज्ञवाली र १० वर्षीया बिन्दु ज्ञवाली रहेका छन्।
उनीहरूको शनिबार राति करिब ८ बजेतिर सशस्त्र प्रहरी टोलीले सकुशल उद्धार गरेको सशस्त्र प्रहरी उपरीक्षक गोपाल अधिकारीले जानकारी दिए।
उद्धारपछि तीनै जनालाई सुरक्षित स्थानमा ल्याइएको छ। पछिल्लो समय लगातारको वर्षाका कारण बाणगंगा नदीमा पानीको बहाव बढेकाले स्थानीयलाई नदी आसपासका क्षेत्रमा सावधानी अपनाउन आग्रह गरिएको छ।
