। नेकपा एमालेका अध्यक्ष केपी शर्मा ओलीले पार्टीका नेता–कार्यकर्ताहरूलाई बनोबल दह्रो बनाउन आग्रह गरेका छन् ।
संविधान दिवसका अवसरमा शनिबार ललितपुरको च्यासलस्थित पार्टी कार्यालयमा आयोजित कार्यक्रमामा उनले पार्टीका नेता–कार्यकर्ताहरूलाई मनोबल दह्रो बनाउन आग्रह गरेका हुन् । ‘संविधान दिवसको अवसरमा म साथीहरूलाई आग्रह गर्न चाहन्छु– मनोबल दह्रो बनाउनुस्,’ अध्यक्ष ओलीले भने, ‘प्रतिक्रियावादीहरूले खुट्टा ढ्यापढ्याप गरेभन्दैमा भाग्ने होइन ।’
पूर्वप्रधानमन्त्रीसमेत रहेका ओलीले प्रतिक्रियावादीहरूसँग एमाले पञ्जा लडाउन तयार रहेको पनि बताए । ‘हामी प्रतिक्रियावादीसँग पञ्जा लडाउन तयार छौं,’ उनले भने, ‘फेरि पनि पञ्जा लडाउँदा हामीले विजय हासिल गर्ने छौं ।’
प्रतिगमनले एकछिन जिने पनि सत्यले सधैंका लागि जित्ने अध्यक्ष ओलीको भनाइ थियो । उनले अहिले पार्टीविरूद्ध हमला भइरहेको पनि बताए । ओलीले आसन्न केन्द्रीय कमिटी बैठकले पार्टीलाई एकताको सुत्रमा बाँध्ने पनि बताए ।
‘अहिले पनि नेकपा एमालेका विरुद्ध हमला भइराखेको छ । पर्सीबाट केन्द्रीय कमिटीको बैठक सुरु हुँदैछ । अत्यत्नै सुदृढ एकताका साथ अगाडि बढ्ने छ,’ ओलीले भने, ‘केन्द्रीय कमिटीले सबै प्रकारका कुनै समस्या देखिएका छन् भने तिनको पनि उपयुक्त समाधान दिने छ । पार्टीलाई सुदृढ एकताको सुत्रमा बाँध्ने छ । अझ सक्रिय, अझ उच्च मनोवलका साथ पार्टी अगाडि जाने छ ।’
एमाले प्रक्रियाक्रियावादीसँग लडेर नेपालको निर्णय शक्तिको रुपमा फेरि स्थापित हुने उनले जिकिर गरे । ‘नेकपा एमाले यही तालले सिध्याउँछु भनेको होला, कुनै तालले नेकपा एमाले सिद्धिनेवाला छैन,’ अध्यक्ष ओलीले भने, ‘यो नेपाली जनताको साचो प्रतिनिधि पार्टी हो । साचो प्रतिनिधि शक्ति हो । अन्धविश्वासमा हिँडेको छैन ।’
