यमनमा सरकारी सेना र विद्रोही हुथी समूहबीचको तनाव तीव्र बनेको छ । बीबीसी अरबी सेवाका अनुसार पछिल्ला २४ घण्टामा सरकारी सेना र हुथी विद्रोहीबीच भएको भिडन्तमा कम्तीमा ६३ जनाको मृत्यु भएको छ ।
केही वर्षको शान्तिपछि यमनमा दुवै पक्षबीच जुलाईदेखि फेरि द्वन्द्व बढेको हो । गत साता हुथी सशस्त्र समूहले अचानक गरेको आक्रमणपछि स्थिति थप बिग्रिएको छ ।
यी आक्रमणपछि हुथी समूह हिन्द महासागर र लाल सागरलाई जोड्ने रणनीतिक रूपमा महत्वपूर्ण बाब अल–मन्देब जलमार्गमा नियन्त्रण क्षेत्र विस्तार गर्न सफल भएको भनिएको छ ।
यमनमा भइरहेको स्थल युद्धसँगै हुथी लडाकुहरूले साउदी अरबमाथि क्षेप्यास्त्र र ड्रोन आक्रमण पनि गरिरहेका छन् ।
उनीहरूले साउदी अरबको तेल ढुवानी गर्ने मालवाहक जहाजलाई समेत लक्ष्य बनाउँदै आएका छन् ।
