: त्रिभुवन अन्तर्राष्ट्रिय विमानस्थल हुँदै तेस्रो मुलुक जान लागेका करिब २० जना बंगलादेशी नागरिकलाई प्रहरीले प्रकाउ गरेको छ।
नेपाललाई ट्रान्जिट बनाएर तेस्रो मुलुक जान लागेका उनीहरूको भ्रमण शंकास्पद् देखिएपछि प्रहरीले प्रस्थान अनुमति रद्द गरेर नियन्त्रणमा लिएको हो।
शुक्रबार मालिन्दो र फ्लाइ दुबईको जहाजबाट झन्डै २० जना शंकास्पद् यात्रा गर्ने बंगलादेशी नागरिकलाई प्रहरीले नियन्त्रणमा लिएको हो। उनीहरूमध्ये अधिकांशले प्रस्थान अनुमति पाइसकेको र केहीले लिन बाँकी रहेको प्रहरी स्रोतले जानकारी दिएको छ।
त्रिभुवन अन्तर्राष्ट्रिय विमानस्थलस्थित अध्यागमन कार्यालयका प्रमुख सिर्जना थपलियाले अनुसन्धान प्रायोजनका लागि प्रहरीले उनीहरूलाई पक्राउ गरेको जानकारी दिइन्। थपलियाले अन्नपूर्णसँग भनिन्, 'प्रस्थान अनुमति पाइसकेका बंगलादेशीहरूसमेत समातिएका छन्। सायद, प्रहरीले अनुसन्धान प्रयोजनका लागि समातेको होला। यसमा अध्यागमनको कुनै भूमिका छैन।'
प्रहरीले बंगलादेशका रुदावा अदननी, इस्माइल हुसैन, रियोद हुसैन, अल अमिन सुहो, रसिदुल इस्लाम, रिपोन, ऐसिन आराफात, एमडी रासेद, अहसानुर हसैन, रोसेल अहमेद, रियोद मियादगायतलाई नियन्त्रणमा लिएर अनुसन्धान थालेको हो।
प्रहरी अनुसन्धानका अनुसार ती बंगलादेशी नागरिकहरू ३० भदौमा नेपाल प्रवेश गरेका थिए। नेपाल प्रवेश गरेको चार दिनमै उनीहरू मलेसिया प्रस्थान गर्न खोजेको अनुसन्धानमा संलग्न प्रहरी स्रोतले जानकारी दिएको छ।
पछिल्लो समय बंगलादेशी नागरिकहरूले नेपाललाई ट्रान्जिट बनाउन थालेपछि प्रहरीले अनुसन्धानको दायरा बढाएको छ। उनीहरूको भ्रमण नै शंकास्पद् देखिएपछि नियन्त्रणमा लिई थप अनुसन्धान थालेको प्रहरी स्रोतको भनाइ छ।
प्रहरीका अनुसार यसअघि पनि बंगलादेशी नागरिकले पटक-पटक नेपाली भूमिको प्रयोग गरी तेस्रो मुलुक जाने प्रयास गरेका थिए। त्यस्तै चिनियाँ नागरिकले बंगलादेशका युवतीहरूलाई नेपाल ल्याएर यहाँबाट चीन लाने गरेका समेत छन्।
