: भारतको तीनदिने औपचारिक भ्रमणमा रहेका अर्थमन्त्री डा. स्वर्णिम वाग्लेले उच्चस्तरीय भेट सुरु गरेका छन्। वाग्लेले बिहीबार साँझ भारतीय समकक्षी निर्मला सीतारमणसँग उच्चस्तरीय भेटवार्ता गरे।
बिहीवार अपराह्न ५ बजे नयाँ दिल्लीस्थित कर्तव्य भवन परिसरमा रहेको भारतीय वित्त मन्त्रालयमा दुई देशका अर्थमन्त्रीबिच औपचारिक भेटवार्ता भयो। भेटमा दुवै देशका उच्चस्तरीय सरकारी प्रतिनिधिमण्डलका सदस्यहरूको समेत सहभागिता थियो।
भारत सरकारको निमन्त्रणामा अर्थमन्त्री डा. वाग्ले बिहीवार बिहान ७ः३५ बजेको उडानबाट नयाँ दिल्ली प्रस्थान गरेका थिए। नेपालमा हालैको विपद्पछिको पुनर्निर्माणका साथै नेपाल र भारतबीचको आर्थिक, राजनीतिक र कूटनीतिक सहकार्य बढाउन भन्दै वाग्ले दिल्ली गएका हुन्।
भ्रमण टोलीमा अर्थ मन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी, नयाँ दिल्लीस्थित नेपाली राजदूतावासका उपनियोग प्रमुख डा. सुरेन्द्र थापा, इकोनोमिक मिनिस्टर तारानाथ अधिकारी र अर्थमन्त्रीका निजी उपसचिव कञ्चन बस्नेत छन्।
वाग्ले शुक्रबार बिहान ९ बजे पूर्वविदेशसचिव श्याम शरणले आयोजना गर्ने उच्चस्तरीय कूटनीतिक संवाद कार्यक्रममा प्रमुख अतिथिका रूपमा सहभागी हुनेछन्। सोही दिन अपराह्न ५ बजे उनले भारतीय विदेशमन्त्री डा. एस. जयशंकरसँग द्विपक्षीय भेटवार्ता गर्नेछन् भने साँझ ७:३० बजे भारत व्यापार संवर्धन संगठनका अध्यक्ष जावेद अ श्राफले आयोजना गर्ने भेटघाट कार्यक्रममा सहभागी हुने तय भएको छ।
त्यसैगरी, शनिबार बिहान ९:३० बजे भारतीय उद्योग परिसंघले आयोजना गर्ने प्रतिष्ठित औद्योगिक घरानाहरूसँगको सम्मेलनमा अर्थमन्त्री डा. वाग्लेले प्रमुख वक्ताका रूपमा सम्बोधन गर्ने कार्यक्रम छ। शनिबार नै बिहान ११:३० बजे दिल्ली स्कुल अफ इकोनोमिक्सले आयोजना गर्ने विकास अर्थनीतिसम्बन्धी प्राज्ञिक छलफलमा प्रमुख अतिथिका रूपमा सहभागी भएर साँझ ४ बजे स्वदेश फर्किने भ्रमण तालिका छ।
