। चिलिमे जलविद्युत् आयोजनाको सुरुङबाट फेला परेका शवहरू बाढीको प्रारम्भिक प्रहारकै कारण प्रभावित भएको देखिएको छ ।
आयोजनाका प्रबन्ध निर्देशक बाबुराजा महर्जनका अनुसार हालसम्मको स्थल मूल्यांकनका आधारमा भेटिएका शवको प्रकृति हेर्दा बाढीको प्रारम्भिक प्रहारकै कारण भएको देखिएको हो । यद्यपि घटनाको वास्तविक तथ्य आधिकारिक मूल्यांकन तथा प्रतिवेदनबाट मात्रै स्पष्ट हुने उनको भनाइ छ ।
घटनाबारे विभिन्न खालका अनुमान र दोषारोपण भइरहेको जनाउँदै महर्जनले त्यस्तो नगर्न आग्रह गरेका छन् । सुरुङमा २१ दिनदेखि जारी उद्धार तथा खोजीका क्रममा हिजो बुधबार ४ जनाको शव र एउटा मानव अंग फेला परेको थियो । त्यसपछि विभिन्न खालका टिकाटिप्पणी भइरहेको भन्दै प्रबन्ध निर्देशक महर्जनले घटनाबारे अनुमान र दोषारोपण नगर्न आग्रह गरे ।
महर्जनले अत्यन्त कठिन र जोखिमपूर्ण अवस्थामा २१ दिनसम्म उद्धार टोलीले सहकर्मी तथा चिलिमे परिवारका सदस्यलाई बचाउन हरसम्भव प्रयास गरेको बताए । उनले घटनाबारे प्रत्यक्ष जानकारी वा स्थलबाट प्रमाणित तथ्यबिना अनुमान, अड्कल र दोषारोपण नगर्न आग्रह गरे ।
‘परिवारहरू अहिले अकल्पनीय दुःखमा छन् । उनीहरूको पीडाको सम्मान गरौं र अनुमानका आधारमा थप पीडा नदिऔँ,’ उनले भनेका छन् ।
महर्जनका अनुसार उद्धार टोली अझै घटनास्थलमै रहेको छ। उनले उद्धार टोलीलाई स्थलगत अवस्थाबारे सञ्चारमाध्यमलाई व्यवस्थित रूपमा जानकारी गराउने समय दिन पनि आग्रह गरेका छन् ।
भदौ १० गते भोटेकोशीमा आएको बाढीपहिरोका कारण रसुवाका विभिन्न जलविद्युत् आयोजनामा ठूलो क्षति पुगेको थियो । चिलिमे जलविद्युत् आयोजनाको सुरुङमा समेत कामदार तथा अन्य व्यक्ति बेपत्ता भएका थिए । ६ जना हराएको भनिएकोमा अझै १ जना सम्पर्कविहिन छन् । ४ जनाको शव र एउटा मानव अंग फेला परेको थियो । यसअघि भदौं १५ गते अन्यत्रबाट बगाएर ल्याएको एउटा शव र एक मानव अंग फेला परेको थियो ।
