: नेपाली कांग्रेसका सभापति गगनकुमार थापाले पार्टीको १५औँ महाधिवेशन विधान र निर्धारित कार्यतालिकाअनुसार नै हुने भन्दै नेता-कार्यकर्तालाई कुनै पनि अलमल र द्विविधामा नपर्न आग्रह गरेका छन्।
निवर्तमान सभापति शेरबहादुर देउवाले संस्थापन पक्षले आयोजना गरेको महाधिवेशनमा सहभागी नहुन आह्वान गर्दै विज्ञप्ति जारी गरेपछि सभापति थापाले पनि सार्वजनिक अपिलमार्फत नेता-कार्यकर्तालाई महाधिवेशन प्रक्रियामा सक्रियतापूर्वक सहभागी हुन आग्रह गरेका हुन्।
थापाले २०८३ असोज १६ देखि १९ गतेसम्म काठमाडौंमा हुने १५औँ महाधिवेशनका लागि असोज ३ र ४ गते वडा तहबाट सुरु हुने अधिवेशनमा उत्साहका साथ सहभागी हुन कांग्रेसका सम्पूर्ण क्रियाशील सदस्य, समर्थक तथा शुभेच्छुकलाई आग्रह गरेका छन्।
उनले नेपालको संविधान, कांग्रेसको विधान र प्रचलित कानुनबमोजिम महाधिवेशन हुन लागेको उल्लेख गर्दै पार्टीभित्र फरक मत र असमझदारी भए पनि त्यसको समाधान संवाद, विधि र पद्धतिबाट खोज्नुपर्ने बताएका छन्।
‘लोकतन्त्रमा फरक मत हुने गर्छन्, पार्टीभित्र आन्तरिक मतभेद र असमझदारी हुनसक्छन् तर ती भिन्न मतको सम्मान गर्न सक्नु, संवाद, विधि र पद्धतिबाट त्यसको समाधान खोज्नु नै लोकतन्त्रको सुन्दर पक्ष हो,’ थापाले अपिलमा भनेका छन्।
महाधिवेशनमा सबैको सहज र उत्साहपूर्ण सहभागिता सुनिश्चित गर्न केन्द्रीय कार्यसमितिले पार्टीभित्र संवाद र सहमतिको वातावरण बनाउन अधिकतम प्रयास गरेको उनको भनाइ छ। उनले सबै सदस्य सहभागी भएर हुने महाधिवेशन नै फरक विचारको सम्मान, सम्बोधन र उचित विचारको अनुमोदन गर्ने उत्तम माध्यम भएको बताएका छन्।
थापाका अनुसार २०८२ पुससम्म नवीकरण भएका सबै क्रियाशील सदस्यलाई अधिवेशन प्रक्रियामा सहज सहभागिता गराउने निर्णय पार्टीले गरिसकेको छ। त्यसअनुसार सदस्यता व्यवस्थापन समितिले सदस्यता नामावली टुंग्याइसकेको र केन्द्रीय निर्वाचन समितिले अधिवेशनको प्रक्रिया अघि बढाइसकेको उनले जानकारी दिएका छन्।
त्यस्तै भदौ २८ गते बसेको केन्द्रीय कार्यसम्पादन समितिको बैठकले विशेष केन्द्रीय महाधिवेशन हुनुअघिको केन्द्रीय कार्यसमितिका तत्कालीन पदाधिकारी तथा सदस्यलाई वर्तमान केन्द्रीय कार्यसमितिको सदस्यका रूपमा समावेश गर्ने निर्णय गरिसकेको थापाले उल्लेख गरेका छन्।
‘तत्कालीन केन्द्रीय कार्यसमितिका पदाधिकारी तथा सदस्य साथीहरू वर्तमान केन्द्रीय कार्यसमितिको पनि सदस्य सुनिश्चित भइसकेकोले १५औँ महाधिवेशनको यो प्रक्रियामा केन्द्रीय सदस्यका रूपमा नै सहभागी हुने हुँदा कुनै पनि अलमल एवं द्विविधामा नपरी असोज ३ र ४ गतेको वडा अधिवेशनलगायत अन्य तहका निर्धारित कार्यतालिकाबमोजिमका अधिवेशनमा सहभागी हुन विशेष आग्रह गर्दछु,’ थापाले भनेका छन्।
थापाले असोज ३ गते वडाबाट सुरु हुने महाधिवेशन प्रक्रिया असोज १६ देखि १९ गतेसम्म काठमाडौंको खुलामञ्चमा हुने १५औँ महाधिवेशनबाट सम्पन्न हुने उल्लेख गरेका छन्।
उनले पार्टीका सबै तहका कार्यसमिति, पदाधिकारी, सदस्य, समर्थक तथा शुभेच्छुकलाई पार्टीको बृहत्तर हितलाई ध्यानमा राख्दै सबैलाई सहभागी गराएर सौहार्दपूर्ण वातावरणमा महाधिवेशन सम्पन्न गर्नसमेत अपिल गरेका छन्। थापाले महाधिवेशनमार्फत कांग्रेसलाई एकताबद्ध र गतिशील बनाउँदै राष्ट्रिय चुनौती सामना गर्नसक्ने बलियो पार्टी निर्माण गर्ने दाबी गरेका छन्।
