: भदौ १० गते आएको बाढीका कारण डुबानमा परी क्षतिग्रस्त बनेको धादिङको जहरे सबस्टेसन मर्मतसम्भारपछि पुनः सञ्चालनमा आएको छ।
जहरेखेतस्थित सबस्टेसनमा बाढीको लेदोसहित करिब १० फिटसम्म पानी जम्दा विद्युत् उपकरण तथा संरचनामा ठूलो क्षति पुगेको थियो। क्षतिपछि नेपाल विद्युत् प्राधिकरणले प्राविधिक जनशक्ति, उपकरण तथा आवश्यक सामग्री परिचालन गरी मर्मत तथा पुनःस्थापनाको काम तीव्र बनाएको थियो।
सबस्टेसन सञ्चालनमा आएसँगै गजुरी बजार, आदमघाट फिडरअन्तर्गतको २२ किलो क्षेत्र तथा पीडा फिडरअन्तर्गत किरान्चोक-मिलनटारलगायत बाढीबाट प्रभावित क्षेत्रमा विद्युत् सेवा पुनःस्थापित भएको छ।
विद्युत वितरण केन्द्र धादिङका कार्यालय प्रमुख चुटुन कुमार श्रीवास्तवका अनुसार सबस्टेसन सञ्चालनमा आएपछि प्रभावित क्षेत्रमा विद्युत् आपूर्ति क्रमशः सामान्य बन्दै गएको छ। नियमित र भरपर्दो विद्युत् सेवा सुनिश्चित गर्न आवश्यक बाँकी कामलाई पनि प्राथमिकताका साथ अघि बढाइएको प्राधिकरणले जनाएको छ।
