: दुर्घटनामा गम्भीर घाइते भएका एक वृद्धलाई अस्पताल पुर्याउनुको सट्टा सडकमा फालेर सिटी सफारी चालक फरार भएका छन् । अस्पताल लैजाने भन्दै सिटी सफारीमा राखी अलि पर लगेर सडकमा छाडिएका ८२ वर्षीय तीर्थराज बस्नेतको केही समयपछि मृत्यु भएको प्रहरीले जनाएको छ ।
आइतबार बिहान विराटनगर महानगरपालिका–९ ठकुरवाडी रोडमा प्रदेश १–०२–००४ ह ९६७५ नम्बरको सिटी सफारीले विराटनगर–८ निवासी बस्नेतलाई ठक्कर दिएको थियो । दुर्घटनामा गम्भीर घाइते भएका उनलाई स्थानीयले उद्धार गरी सोही सिटी सफारीमा राखेर उपचारका लागि पठाएका थिए ।
तर,घाइते वृद्धलाई अस्पताल पुर्याउनुको सट्टा चालकले विराटनगर–७ स्थित मालपोत कार्यालयनजिकै सडकमा छाडेको खुलेको छ । प्रहरीका अनुसार वृद्धलाई सडकमा छाडेपछि चालक सिटी सफारीसहित त्यहाँबाट फरार भएका थिए । मोरङ प्रहरी प्रमुख एसपी कवित कटवालका अनुसार केही समयपछि मालपोत कार्यालयनजिकै वृद्ध मृत अवस्थामा फेला परेका हुन् । बिहान करिब ६:३० बजेतिर वृद्ध पुरुष सडकमा मृत अवस्थामा रहेको सूचना आएपछि प्रहरी घटनास्थल पुगेको थियो ।
घटनाको अनुसन्धानका लागि जिल्ला प्रहरी कार्यालय मोरङबाट डीएसपी मकेन्द्रकुमार मिश्रको नेतृत्वमा प्रहरी टोली परिचालन गरिएको थियो । सुरुमा मृतकको पहिचान खुल्न सकेको थिएन । पछि विराटनगर–८ का माधव बस्नेतले मृतक आफ्ना बुवा तीर्थराज बस्नेत भएको सनाखत गरेका थिए ।
प्रहरीका अनुसार दुर्घटनापछि घाइतेलाई तत्काल अस्पताल पुर्याइएको भए उनको ज्यान जोगिन सक्ने थियो । तर,उपचारको जिम्मेवारी लिनुपर्ने चालकले घाइतेलाई बीच सडकमा छाडेर भागेको घटनाले मानवीय संवेदनामाथि नै गम्भीर प्रश्न उठाएको एसपी कटवालले बताए । ‘अस्पताल लगेर भर्ना गरेको भए वृद्धको ज्यान बच्न सक्ने अवस्था थियो । तर,सडकको किनारमा छाडेर चालक फरार भएको देखिन्छ,’एसपी कटवालले भने ।
घटना लगत्तै प्रहरीले सिटी सफारी र चालकको खोजी थालेको थियो । खोजीका क्रममा बिहान करिब ८:३० बजेतिर मोरङको कटहरी गाउँपालिका–२ स्थित आफ्नै घरबाट ५५ वर्षीय अर्जुन भगत पक्राउ परेका छन् । पक्राउ परेका भगतलाई जिल्ला प्रहरी कार्यालय मोरङमा राखिएको छ ।
‘शव फेला परेको जानकारी आउनसाथ डीएसपीको नेतृत्वमा टोली घटनास्थल पुग्यो । घटनाको प्रारम्भिक अनुसन्धानबाट वृद्धलाई सिटी सफारीले ठक्कर दिएको र चालकले अर्कै ठाउँमा लगेर सडकमा फालेर फरार भएको पाइयो । सफारी चालकको पहिचान तत्काल हुन सकेन ।
प्रहरी सक्रियताका कारण पहिचान गरेर केहीबेरमै घटनामा संलग्न चालकलाई पक्राउ गर्न सफल भइयो,’एसपी कटवालले भने । प्रहरीले आवश्यक कानुनी प्रक्रिया पूरा गरी मृतक बस्नेतको शवलाई पोस्टमार्टमका लागि कोशी अस्पताल पठाएको छ । घटनाको थप अनुसन्धान भइरहेको जानकारी प्रहरीले दिएको छ ।
