: पूर्वप्रधानमन्त्री एवं नेपाली कम्युनिस्ट पार्टी (नेकपा)का संयोजक पुष्पकमल दाहाल प्रचण्डले नुवाकोट पुगेर बाढी प्रभावित क्षेत्रको निरीक्षण गरेका छन्।
भदौ १० गते भोटेकोशीमा आएको विनाशकारी बाढीका कारण नुवाकोटका विभिन्न क्षतिग्रस्त क्षेत्रको प्रचण्डले स्थलगत निरीक्षण गरेका हुन्। उनले नुवाकोटको महादेवफांट, देवीघाट, ढुङ्गे र त्रिशूली बजार लगायतका प्रभावित क्षेत्रको निरीक्षण गरे।
निरीक्षण प्रश्चात् प्रचण्डले सरकारले प्रभावकारी रूपमा राहत, उद्धार तथा पुनर्निर्माणसँगै पीडितहरूको पुनःस्थापना गर्नुपर्नेमा जोड दिए। तीनै तहको सरकारले बिपत्तिको सामना गर्न विभिन्न प्रभावकारी कार्यक्रमहरु ल्याउनुपर्ने प्रचण्डको भनाइ छ।
बाढीले क्षति गरेका नुवाकोटका विभिन्न सम्पदा, पहिचान तथा धार्मिक एवं पर्यटकीय स्थलहरूको पुनर्निर्माण पनि जरुरी रहेको प्रचण्डले उल्लेख गरे। काठमाडौंबाट सडकमार्ग हुँदै नुवाकोटका बाढीग्रस्त क्षेत्रहरुमा पुगेका प्रचण्डले बाढीपीडितहरूसँग भेट गरी उनीहरूका गुनासा समेत सुने। प्रचण्डले बाढीले बगाएको देवीघाटमा निर्माण गरिएको बेलीब्रिजको समेत निरीक्षण गरेका छन्।
