: बाढीले खण्डहर बनाएका नुवाकोटका विभिन्न स्थानको चिनियाँ राजदूतले स्थलगत अवलोकन गरेका छन्। बाढी गएको १६ दिनपछि बिहीबार नेपालका लागि चिनियाँ राजदूत चाङ माओमिङले नुवाकोटका बाढीग्रस्त स्थानहरूको स्थलगत अवलोकन, निरीक्षण तथा भ्रमण गरेका हुन्।
राजदूत माओमिङले आफ्ना अधिकारीहरूसहित नुवाकोटको बाढीग्रस्त विदुर नगरपालिकाका विभिन्न स्थानको निरीक्षण गरेको जिल्ला प्रशासन कार्यालय नुवाकोटले जनाएको छ। माओमिङले भोटेकोशी नदी हुँदै रसुवागढी नाकाबाट त्रिशूली नदीमा यही भदौ १० गते आएको अकल्पनीय बाढीले क्षति पुर्याएका नुवाकोटका ढुंगे, त्रिशूली, शुभघाट, भैंसेलगायतका स्थानहरूको अवलोकन भ्रमण गरेका हुन्।
काठमाडौंबाट स्थलमार्ग हुँदै नुवाकोट आइपुगेका चिनियाँ राजदूतले राहत, उद्धार तथा पुनर्निर्माणमा सहयोग गर्ने जनाएका छन्। विपत्तिमा सधैं नेपाललाई चीनले सहयोग गरिरहेको समेत उनले बताए। चिनियाँ राजदूत माओमिङले नुवाकोटका सरकारी अधिकारीहरूसँग विनाशकारी बाढीले गरेको क्षतिका सम्बन्धमा संक्षिप्त जानकारीसमेत लिएका छन्। विनाशकारी बाढीमा परी बिहीबारसम्म नुवाकोटमा १ सय ९८ जनाको शव निकालिएको छ। जिल्ला प्रशासन कार्यालय नुवाकोटका अनुसार बाढीमा परेका ६६ जनाको उपचार गरिएको छ भने बिहीबारसम्म पनि खोजी कार्य जारी रहेको छ।
हालसम्म २ सय ७१ जना विदेशी नागरिकसहित २ हजार ६ सय ९१ जना हराइरहेको प्रशासनका अधिकृत रूपेशप्रसाद नेपालले जानकारी दिए। बाढीमा परेका, फसेका र विभिन्न स्थानमा अड्किएकासमेत गरी ३ हजार ४ सय ९१ जनाको हवाई तथा स्थलगत उद्धार गरिएको उनले बताए। नुवाकोटका बाढीपीडितहरूका लागि विभिन्न २५ स्थानमा कायम आश्रय केन्द्रमा हालसम्म १ हजार २ सय ९४ महिलासहित २ हजार ६ सय २० जना आश्रित छन्।
