: नेकपा (एमाले)का सचिव एवं पूर्वमन्त्री महेश बस्नेतले जेनजी आन्दोलनका नाममा आफ्नो निजी घर जलाइएको भन्दै आक्रोश व्यक्त गरेका छन्। सूर्यविनायक-७ गुण्डुस्थित उनको जलाइएको घरको प्राङ्गणमा बुधबार आयोजित भन्डाफोर तथा विरोध कार्यक्रमलाई सम्बोधन गर्दै सचिव बस्नेतले पीडित आफ्नो परिवारलाई प्रहरी र राज्यले न्याय नदिएको बताएका हुन्।
आफ्नो घरसँगै बुवाआमाको पसिनाको कमाई,छोराछोरीको बाल्यकालको सम्झना सबैथोक जलाइनुका साथै आफ्नो बुवाआमा र श्रीमतीलाई समेत जिउँदै जलाउन प्रयास गरिएको उनले स्मरण गरे। ‘त्यो क्रुर घटनापछि मेरो आमा एन्जाइटीको बिरामी हुनुभएको छ, बुवाको दुईपटक मुटुको भल्भ फेर्नुपर्यो।’उनले भने, ‘योजनावद्धरुपले हाम्रो परिवारलाई आर्थिक, भौतिक, मानसिक र भावनात्मकरुपले तहसनहस पारियो।’
आफूहरूको एक वर्षदेखि डेरामा बास रहेको बताउँदै पूर्वमन्त्री बस्नेतले आफ्नो निजी सम्पत्ति जलाउनेलाई प्रमाणसहित उजुरी दिँदा पनि कारबाही नगरिएको आरोप लगाए। घर जलाउनेहरुको हिसावकिताव राखिरहेको स्पष्ट पार्दै उनले राज्यले न्याय नदिए उनीहरूको घर पनि त्यसैगरी जलाउन बाध्य हुने चेतावनी दिए।
गत वर्ष भदौ २३ र २४ गतेको जेनजी आन्दोलनलाई एमाले सचिव बस्नेतले साम्राज्यवादी शक्तिको इशारामा देशघाती समूहले गरेको विध्वंसको रूपमा टिप्पणी गरे। राज्यका तीनै अङ्गमा एकसाथ प्रहार गरिएको स्मरण गर्दै उनले संसद भवन,सिंहदरवार र सर्वोच्च अदालत जलाउनु देशद्रोह भएको दाबी गरे। उनले नेपाली सेना लगायत सुरक्षा निकायको भूमिकामा पनि अनुसन्धान गर्नुपर्ने स्पष्ट पारे।
दुई दिनमा राज्यको ४४ अर्व र निजी क्षेत्रको साढे ३३ अर्ब क्षति गराएको समूहले नै अहिले सरकार चलाइरहेका आरोप लगाउँदै यो सरकार रहुन्जेल राष्ट्रघात भइरहने उनको भनाइ छ।
सिंहदरबार, संसद् भवन जलाउने र गोली चलाउने काम एउटै समूहले गरेको आरोप लगाए। उनले देश जलाउने नियोजित षडयन्त्रमा वर्तमान प्रधानमन्त्री बालेन्द्र शाह,गृहमन्त्री सुधन गुरुङ र रास्वपा सभापति रवि लामिछाने लगायतको प्रमुख भूमिका रहेको आरोप लगाए। ‘हामीले यथेष्ट प्रमाण राखेका छौं, उनीहरूलाई यसबापत उन्मुक्ति हुने छैन’ उनले भने।
बस्नेतले संयुक्त राष्ट्रसंघको कार्यक्रमबाट फर्के लगतै राजीनामा दिन प्रधानमन्त्री बालेन्द्र शाहलाई आग्रह गरे। बस्नेतले वर्तमान सरकार रहेसम्म देशको हित नहुने भन्दै संयुक्त राष्ट्रसंघको कार्यक्रमबाट फर्किएलगत्तै राजीनामा दिनुपर्ने बताए। उनले जेनजी आन्दोलनमा ६ जना प्रहरीको हत्या गरिएको उल्लेख गर्दै दोषीमाथि कडा कानुनी कारबाही हुनुपर्ने माग गरे।
उनले राहत कोषमा सरकारले १२ अर्ब कब्जा गरेकाले एमालेले आफ्ना कार्यकर्ताको गाँस कटाएर उठाएको १ करोड २० लाख रुपैयाँ सीधै बाढी पीडितलाई वितरण गरिएको धारणा राखे। स्थानीय तहले जग्गा उपलब्ध गराएमा एमालेले पीडितहरूका लागि ५०० वटा अस्थायी बास स्थान/घर निर्माण गरिदिने उनको भनाइ छ।
