: झापाबाट लागुऔषध खैरो हेरोइनसहित तीनजना पक्राउ परेका छन्। लागुऔषध नियन्त्रण ब्युरो शाखा कार्यालय काँकडभिट्टाबाट खटिएको प्रहरी टोलीले भारतबाट लागुऔषध खैरो हेरोइन खरिद गरी कोशी प्रदेशका विभिन्न जिल्लामा बिक्री गर्ने गरेको सूचनाका आधारमा उनीहरूलाई पक्राउ गरेको हो।
प्रहरीका अनुसार पक्राउ पर्नेमा अर्जुनधारा नगरपालिका–११ का २१ वर्षीय गोविन्द श्रेष्ठ,बिर्तामोड नगरपालिका–११ का ३० वर्षीय कृष्णबहादुर प्रधान र कनकाई नगरपालिका–४ का ३२ वर्षीय रोशन चौधरी रहेका छन्।
उनीहरूलाई झापा मेचीनगर नगरपालिका–६ र कनकाई नगरपालिका–५ बाट लागुऔषध खैरो हेरोइन २०.६३० ग्रामसहित पक्राउ गरिएको हो। पक्राउ परेकाहरूलाई आवश्यक अनुसन्धानका लागि इलाका प्रहरी कार्यालय काँकडभिट्टा र इलाका प्रहरी कार्यालय अनारमनी, झापा बुझाइएको लागुऔषध नियन्त्रण ब्युरोले जनाएको छ।
प्रहरीले उनीहरूको साथबाट खैरो हेरोइन २०.६३० ग्राम,दुई थान मोबाइल,नेपाली नगद २६ सय रुपैयाँ र एक थान साइकलसमेत बरामद गरेको जनाएको छ।
