: नेकपा एमालेका महासचिव शंकर पोखरेलले वर्तमान सरकार जेन्जी आन्दोलनको भावना अनुसार नभई, हाइज्याक गर्नेहरूको योजनामा चलेको दाबी गरेका छन्। जेनजी आन्दोलन पुगेको १ वर्ष पुगेको अवसरमा उनले शान्तिपूर्ण प्रदर्शनमा घुसपैठ गर्ने र गराउने योजनाकार तथा षड्यन्त्रकारीहरूको पहिचान गरी कारबाहीको दायरामा ल्याउनु नै 'जेन्जी आन्दोलन'को वास्तविक भावनाको सम्मान रहेको बताएका हुन्।
‘नवयुवाहरूको शान्तिपूर्ण प्रदर्शनलाई सुरुदेखिनै नियोजित रूपमा भड्काएर हिंसात्मक बनाउने सुनियोजित षड्यन्त्र भएको थियो भन्ने कुरा अब घामजस्तै छर्लङ्ग भइसकेको छ। उनले भने,‘शान्तिपूर्ण प्रदर्शनमा घुसपैठ गर्ने र गराउने योजनाकार तथा षड्यन्त्रकारीहरूको पहिचान गरी उनीहरूलाई कानुनी कारबाहीको दायरामा ल्याउनु नै 'जेन्जी आन्दोलन'को वास्तविक भावनाको सम्मान गर्नु हो।’
संवेदनशील अवस्थामा नव युवाहरूको वास्तविक भावनाको कदर गर्नु,मुलुकमा सुशासनको प्रत्याभूति दिनु र विधिको शासन स्थापित गर्नु आजको प्रमुख आवश्यकता रहेको उनको ठहर छ।
तत्कालीन सरकारले सामाजिक सञ्जाल बन्द होइन नियमन गर्न खोजेको भन्ने विषय स्पष्ट गर्न नसक्दा सामाजिक संजालमा अभ्यस्त बनेको नयाँ पुस्ता सडकमा आउन पुगेको उनको भनाई छ।
महासचिव पोखरेलले नेकपा (एमाले) नवयुवाहरुको भावनाको सम्मान गर्न र जायज मागहरूलाई नवयुवाहरुसँग मिलेर सम्बोधन गर्न प्रतिबद्ध रहेको बताए। ‘नेकपा (एमाले) नवयुवाहरुको भावनाको सम्मान गर्न र जायज मागहरूलाई नवयुवाहरुसंग मिलेर सम्बोधन गर्न प्रतिबद्ध छ। उनले सामाजिक सञ्जालमार्फत भने,‘नेकपा (एमाले) हिजो पनि नवयुवाहरुको पक्षमा थियो, आज पनि छ र भोलि पनि रहने छ । हिजो नव युवाहरूको भावना र मागको सम्बोधनमा केही कमजोरी रहन गएको भए त्यसमा सुधार गर्दै अघि बढ्न नेकपा(एमाले) प्रतिबद्ध छ ।’
तत्कालीन सरकारले सामाजिक सञ्जाल बन्द होइन नियमन गर्न खोजेको भन्ने विषय स्पष्ट गर्न नसक्दा सामाजिक संजालमा अभ्यस्त बनेको नयाँ पुस्ता सडकमा आउन पुगेको उनको भनाई छ। महासचिव पोखरेलले भने,‘जेन्जी आन्दोलनका क्रममा नव युवाहरूले अगाडि सारेका भ्रष्टाचार नियन्त्रण गरी सुशासन कायम गर्नुपर्ने, सेवा प्रवाहलाई सुलभ बनाउनुपर्ने र सामाजिक सञ्जालको निर्वाध प्रयोग गर्न पाउनुपर्ने मागहरू अत्यन्त जायज थिए। यी मागहरू हामी सबैको साझा सरोकारका विषय हुन् । नेपाल सरकारले त्यतिवेला सामाजिक सञ्जालमाथि प्रतिबन्ध लगाएको थिएन, बल्कि यसलाई नियमन गर्न सहज बनाउनेगरी नेपालमा दर्ता हुनुपर्ने नीति अगाडि बढाएको थियो। तर सरकारले उक्त कुरालाई स्पष्ट गर्न नसक्दा सामाजिक संजालमा अभ्यस्त बनेको नयाँ पुस्ता सडकमा आउन पुग्यो ।’
आन्दोलन जीवन गुमाउने सबै नवयुवाहरूप्रति भावपूर्ण श्रद्धाञ्जली अर्पण गर्दै घाइतेहरू र आफ्ना सन्तान गुमाउनेहरुप्रति समवेदना प्रकट गरेका छन्। उनले भने,‘आज भाद्र २३ गते—गत वर्ष 'जेन्जी आन्दोलन'का क्रममा भएको घुसपैठ र संसद भवनभित्र प्रवेश गर्ने क्रममा भएको झडपमा दर्जनौँ युवाहरूले ज्यान गुमाएका र सयौँ घाइते भएका थिए। उक्त दुःखद घटनाको एक वर्ष पूरा भएको छ। उक्त घटनामा जीवन गुमाउने सबै नवयुवाहरूप्रति भावपूर्ण श्रद्धाञ्जली अर्पण गर्दै उक्त आन्दोलनमा परी घाइतेहरू र आफ्ना सन्तान गुमाउनेहरुप्रति समवेदना प्रकट गर्दछु ।’
