। राष्ट्रिय मानव अधिकार आयोगले विपद् प्रभावितहरुको आधारभूत मानव अधिकार संरक्षण गर्न आग्रह गरेको छ ।
भदौ १० गतेको बाढीबाट प्रभावितहरूको मानव अधिकार अवस्थाको बारेमा आयोगका सदस्य लीली थापाको नेतृत्वमा गएको उच्चस्तरीय अनुगमन टोलीले रसुवा र नुवाकोट जिल्लाको स्थलगत अनुगमन गरेको छ ।
अनुगमनपछि आयोगले यस्तो आग्रह गरेको हो ।
अनुगमनका क्रममा बाढीबाट भौतिक संरचनामा ठूलो क्षति पुगेको, प्रभावित क्षेत्रमा खानेपानी, विजुली, स्वास्थ्य सेवाको अभाव देखिएको, उद्धार कार्यमा विज्ञहरुको अभाव रहेको आयोगले जनाएको छ ।
सुरक्षाकर्मीको संख्या न्यून रहेको, उद्धार सामग्रीहरुको कमी रहेको, सर्वसाधारणको आवतजावतमा समस्या देखिएको लगायतका समस्याहरु आयोगले गरेको अनुगमनका क्रममा पाइएको जनाइएको छ ।
यसआधारमा सरकारले तीन वटा विषयमा सरकारको ध्यानाकर्षण गरेको छ–
(क) बाढीले रसुवा र नुवाकोट जिल्लामा आधारभूत आवश्यकताका भौतिक संरचनामा क्षति पुर्याएको हुँदा खानेपानी, विजुली, स्वास्थ्य सेवा जस्ता आधारभूत सेवाहरु नियमित रुपमा संचालन गरी प्रभावितहरुको मानव अधिकारको संरक्षण गर्न विज्ञता सहितको प्राविधिक टोलीको व्यवस्था र परिचालन गर्न, गराउन ।
(ख) उद्धार कार्यलाई अझ प्रभावकारी बनाउन सुरक्षाकर्मीको सङ्ख्या वृद्धि गरी उद्धार कार्यलाई निरन्तरता दिन र उद्धार टोलीका लागि उद्धार सामग्रीहरुको पर्याप्त व्यवस्था गर्न, गराउन ।
(ग) यातायात तथा आवातजावत बन्द हुँदा नागरिकको दैनिक जनजीवनमा प्रभाव परेको हुँदा वैकल्पिक यातायातको व्यवस्था गर्न, गराउन ।
