। इरानी संसद्का सभामुख मोहम्मद बगर गालिबाफले इरानी सेनाको शक्तिशाली जवाफबाट अमेरिका र उसका सहयोगीहरू हताश अवस्थामा पुगेको दाबी गरेका छन् ।
आइतबार संसद्लाई सम्बोधन गर्दै उनले यस्तो टिप्पणी गरेका हुन् । ‘इरानी सैन्य बलले अमेरिकी ठेगानाहरूमा शक्तिशाली आक्रमण गरेपछि अमेरिका र उसका सहयोगी देशहरू हताश अवस्थामा पुगेका छन्,’ गालिबाफले भनेका छन् ।
उनले विरोधी पक्षले नाराका भरमा युद्धक्षेत्रका तस्वीर तथा भिडिओ बनाउन आर्टिफिसियल इन्टेलिजेन्सको प्रयोग गरिरहेको आरोप लगाएका छन् ।
सभामुख गालिबाफले अमेरिकालाई सीमित जवाफको समय सकिएको बुझ्न आग्रह गरेका छन् । उनले हालैका अभियानमा गरिएका इरानी आक्रमण सुरुवात मात्र भएको पनि बताएका छन् । उनले भनेका छन्, ‘यदि अमेरिकाले अहिलेसम्म स्थिति बुझेको छैन भने, धेरै ढिला हुनुअघि नै उसले खेलका नियमहरू बदलिसकेको कुरा बुझ्नुपर्छ ।’
गालिबाफले इरानको आगामी जवाफी कारबाही अझ तीव्र हुने दाबी गरेका छन् । अमेरिका र इरानले शनिबार जहाजहरूमा एक–अर्काविरुद्ध जवाफी आक्रमण गरेका थिए ।
