: इजिप्टको एक अदालतले बहुचर्चित टेलिभिजन प्रस्तोता सारा खलिफासहित ११ जनालाई लागुऔषध तस्करी तथा उत्पादनको अभियोगमा मृत्युदण्डको फैसला सुनाएको छ।
सरकारी समाचार संस्था अल-अहरामका अनुसार उनीहरू लागुऔषध उत्पादनका लागि आवश्यक कच्चा पदार्थ अवैध रूपमा आयात गरी बिक्री-वितरण गर्ने अन्तर्राष्ट्रिय आपराधिक गिरोहमा संलग्न रहेको ठहर भएको हो। विशेष कारबाहीका क्रममा प्रहरीले ७५० किलोग्रामभन्दा बढी लागुऔषध, कच्चा पदार्थ तथा अवैध हातहतियार र गोलाबारुद बरामद गरेको थियो।
अदालतले ३९ वर्षीया प्रस्तोता खलिफासहित ११ जनालाई मृत्युदण्डको सजाय सुनाएको छ। सोही मुद्दामा संलग्न अन्य ९ जनालाई जन्मकैदको फैसला र ७ जनालाई सफाइ दिइएको छ।
इजिप्टको कानुनी प्रक्रियाअनुसार गत महिना सुनाइएको प्रारम्भिक फैसलालाई त्यहाँका मुख्य धार्मिक अधिकारी 'ग्रान्ड मुफ्ती'को औपचारिक स्वीकृति र रायपछि मात्र अन्तिम पुष्टि गरिएको हो।
अन्तर्राष्ट्रिय तथा अपराध अनुसन्धानमा आधारित चर्चित टेलिभिजन कार्यक्रम 'मिशन इम्पसिबल'की प्रस्तोता खलिफाले भने आफूमाथि लगाइएका सबै अभियोग अस्वीकार गरेकी छन्। लागुऔषध नियन्त्रण कार्यालयमा तस्बिर खिच्ने क्रममा मात्र आफूले पहिलोपटक सो लागुऔषध देखेको दाबी गर्दै उनका वकिलले फैसलाविरुद्ध माथिल्लो अदालतमा पुनरावेदन (अपील) गर्ने जनाएका छन्।
मानवअधिकारवादी संस्था एम्नेस्टी इन्टरनेसनलका अनुसार इजिप्टमा मृत्युदण्डको सजाय व्यापक रूपमा प्रयोग हुने गरेको छ। प्रत्यक्ष हत्या बाहेकका लागुऔषधसम्बन्धी कसुरमा पनि मृत्युदण्ड दिइने इजिप्टको यो कदमको अन्तर्राष्ट्रियस्तरमा निरन्तर आलोचना हुँदै आएको छ।
