। सगरमाथा स्म्यासर्सले एक्सट्रिम इनर्जी ड्रिंक नेपाल भलिबल लिग(एनभीएल) मा शनिबार खप्तड फाल्कन्स सुदूरपश्चिमलाई सोझो सेटमा पराजित गर्दै लगातार दोस्रो जित हात पारेको छ ।
त्रिपुरेश्वरस्थित दशरथ रंगशाला कभर्डहलमा भएको भएको सगरमाथाले खप्तड फाल्कन्सलाई ३–० को सेटमा हरायो । सगरमाथाले पहिलो र दोस्रो सेट समान २५–१८ ले आफ्नो पक्षमा पर्दै खेलमा पकड बनाएको थियो । तेस्रो सेट पनि २५–१९ ले जित्दै सगरमाथाले एकपक्षिय रुपमा खेल जित्यो ।
यस लिगमा सोझो सेटमा नतिजा निस्केको यो पहिलो खेल हो ।
सगरमाथाका पाकिस्तानी स्पाइकर अइमल खान ‘प्लेअर अफ द म्याच’ घोषित भए । उनले सर्वाधिक १८ अंक स्कोर गरे । उनी पहिलो खेलमा मधेश विरुद्ध पनि ‘प्लेअर अफ द म्याच’ बनेका थिए । यस्तै सगरमाथाका फखर खानले पनि १५ अंक जोडे । खप्तडका लागि अर्टेम किस्लेभले १२ र बोस्को डेटले १० अंक जोडे ।
लगातार दुई खेलमा जित हात पारेको सगरमाथा ६ अंकसहित शीर्ष स्थानमा छ । सगरमाथाले उद्घाटन खेलमै मधेश वारियर्सलाई ३–१ ले हराएको थियो ।
लगातार दोस्रो जितपछि सगरमाथाका मुख्य प्रशिक्षक उत्सव खड्काले टिमको कम्बिनेसन मिल्दै गएको बताए । खप्तडविरुद्ध सोझो सेटमा जित अपेक्षा नगरेपनि पहिलो खेलको अनुभवपछि टिमले राम्रो प्रदर्शन गरेको प्रतिक्रिया दिए ।
अप्तडका मुख्य प्रशिक्षक रुपेश विष्टले पहिलो खेलमा विदेशी खेलाडीहरुले अपेक्षा अनुसार खेल्न नसकेकोले पराजित हुनुपरेको बताए ।
काठमाडौंको थ्रिलिङ जित
शनिबार भएको पहिलो थ्रिलिङ खेलमा काठमाडौं रेड्सले मधेश वारियर्सलाई ३–२ को सेटमा हराएर विजयी सुरुवात गरेको छ ।
पहिलो सेट गुमाएपनि काठमाडौंले खेलमा पुनरागमन गरेको थियो । मधेशले पहिलो सेट २५–२० ले आफ्नो पक्षमा पारेको थियो । तर दोस्रो सेट टाईब्रकेमा पुग्दा काठमाडौंले २६–२४ ले आफ्नो पक्षमा पार्दै खेलमा फर्कियो । तेस्रो सेट काठमाडौंले सहजै २५–१७ ले आफ्नो पक्षमा पार्दै २-१ को अग्रता बनायो । चौथो सेटमा मधेश खेलमा फर्कियो र २५–२२ ले आफ्नो पक्षमा पार्दै खेललाई पाँचौ सेटसम्म पुर्यायो ।
पाँचौ तथा अन्तिम सेट निकै प्रतिस्पर्धात्मक बन्दा काठमाडौंले टाईब्रेकमा १६–१४ ले आफ्नो पक्षमा पार्दै बाजी मारेको हो ।
यस लिगमा पाँचौ सेटसम्म पुगेको यो पहिलो खेल हो ।
काठमाडौं रेड्सको जितमा पुरा छाएका अहमद मुस्ताफा खान ‘प्लेअर अफ द म्याच’ घोषित भए । उनी एक्लैले सर्वाधिक ४५ अंक स्कोर गरे । यस्तै कप्तान सुनिल बोहराले २४ अंक योगदान गरे । मधेशमा जिबिन सेबास्टिएनले ३३ अंक स्कोर गरेपनि जितका लागि पर्याप्त भएन ।
काठमाडौंका मुख्य प्रशिक्षक नृप बहादुर विकले लिगमा विजयी सुरुवात गर्दा खुशी व्यक्त गरे । मधेशका सहायक प्रशिक्षक सुरज भुजेलले दोस्रो खेलमा पनि विदेशी खेलाडीहरुले अपेक्षा अनुसार खेल्न नसक्दा पाँचौ सेटमा पुगेर पनि पराजित हुनुपरेको बताए ।
जितपछि काठमाडौंले २ अंक जोड्दा मधेशले पनि १ अंक जोड्दै अंकको खाता खोलेको हो ।
मधेशको भने यो लगातार दोस्रो हार हो । पहिलो खेलमा मधेश सगरमाथा स्म्यासर्ससंग पराजित भएको थियो ।
एनभीएलमा आइतबार पनि दुई खेल हुनेछ । पहिलो खेल अन्नपूर्ण स्पाइकर किङ्स र काठमाडौं रेड्सबीच अपरान्ह ४ बजे सुरु हुनेछ भने कर्णाली शिवराज र खप्तड फाल्कन्सबीच साँझ ७ बजे दोस्रो खेल हुनेछ ।
केडिया ग्रुपको आयोजनामा पहिलो पटक भइरहेको पुरुष भलिबलको प्रेन्चाइज लिगमा ६ टोलीले प्रतिस्पर्धा गरिरहेका छन् । लिगको विजेताले नगद २० लाख पुरस्कार प्राप्त गर्नेछन् ।
