: उत्तरी गोरखाको चुमनुब्री गाउँपालिका वडा नं. ४ नाम्रुङस्थित थेराङ खोलाको बाढीले दुईवटा पुल र दुईवटा जलविद्युत् आयोजना बगाउँदा स्थानीयवासी संकटमा परेका छन्। राति दुई बजेतिर पहिरोसहित आएको बाढीले मनास्लु पदमार्गमा रहेका दुईवटा पुल र दुईवटा जलविद्युत् आयोजना बगाएको स्थानीय लाक्पा डुण्डुप लामाले जानकारी दिए।
थेराङ खोलाको बाढीले नाम्रुङबाट माथि जाने पुल बगाएको छ भने सोही बाढीका कारण बूढीगण्डकीको बहाव बढ्न गई नाम्रुङभन्दा तल रहेको पुल पनि बगाएको छ। 'बाढीले त हामीलाई आपत्विपत्मा पार्यो,' उनले भने, 'माथि जाने पुल पनि बगायो, तल झर्ने पुल पनि बगायो। कतै जान पनि नमिल्ने भयो।' साथै स्थानीयले उपभोग गर्दै आएका दुईवटा लघुजलविद्युत् आयोजना पनि जगैदेखि बगाएर लगेको उनले बताए। 'एउटा भर्खर सात करोड रुपैयाँ खर्चेर निर्माण सम्पन्न भई परीक्षण प्रसारण भएको १०० किलोवाटको जलविद्युत् थियो, त्यो पनि लग्यो। अर्को पहिलेदेखि नै बालिरहेको १५ किलोवाटको जलविद्युत् थियो, त्यो पनि नामेट पारेर लग्यो।' आवतजावत र विद्युत् दुवै ठप्प हुँदा जनजीवन संकटमा पर्ने उनको चिन्ता छ।
विद्युत् नहुँदा बत्ती बाल्न, सञ्चार सेवा तथा विद्युत्बाट चल्ने सबै सेवा ठप्प भएका छन्। पुल बगाएपछि भर्खर सुरु हुँदै गरेको मनास्लुको पर्यटक आवागमन प्रभावित भएको छ। लार्के पासका लागि गएका सयौँ पर्यटक बूढीगण्डकीको पुल नहुँदा अलपत्र परेका छन्।
पहिरोसँगै आएको बाढीले राति स्थानीय चारजनाको घर बगाएको वडाअध्यक्ष पेमा ग्याल्बो लामाले बताए। बाढीले स्थानीय नुर्बु ओङ्ग्याल, ओर्गेन छयोदेन, लाक्पा भुटी र मिङ्मार लामाको घर बगाएको जिल्ला प्रहरी कार्यालय गोरखाले जनाएको छ।
'भूकम्प आएजस्तै गरी गाउँ थर्काएछ, सबै ब्युँझिएछन्। अनि बाढी आएको थाहा पाएपछि भागेर ज्यान जोगाएका रहेछन्,'स्थानीय फुर्बु ठिलेले भने, 'नत्र सबैलाई बढारेर लैजान्थ्यो।'
बाढीपीडित चार घरलाई तत्काल अल्पकालीन राहत दिने वडाअध्यक्ष पेमा ग्याल्बो लामाले बताए। 'घरको केही पनि जोगिएन, त्यसैले तत्काल आजै खाद्यान्न र लुगाकपडाका लागि २० हजार रुपैयाँका दरले राहत दिन्छौँ,' उनले भने, 'केही दिनमा गाउँपालिकाको तर्फबाट एक लाख रुपैयाँबराबरको राहत दिनेछौँ।' अन्यत्रबाट आउने राहतका लागि पनि पहल गर्ने उनले बताए।
