। रसुवाको भोटेकोशी नदीमा आएको विनाशकारी बाढीबाट प्रभावित नागरिकहरूको राहत तथा उद्धारका लागि जापानस्थित दिपओए जापान कम्पनी प्रालिले ३६ लाख जापानी येन आर्थिक सहयोग गरेको छ।
कम्पनीका निर्देशक एवं प्रबन्ध निर्देशक दीपक सुवेदीका अनुसार, बाढीपीडितको घाउमा मलम लगाउन कम्पनीको संस्थागत तर्फबाट ३० लाख येन र त्यहाँ कार्यरत कर्मचारीका तर्फबाट ६ लाख येन गरी कुल ३६ लाख येन संकलन गरिएको हो।
संकलित उक्त रकम नेपाल सरकारको प्रधानमन्त्री दैवी प्रकोप उद्धार कोषको बैंक खातामा जम्मा गरिसकिएको सुवेदीले अनलाइनखबरलाई जानकारी दिए।
प्रवासमा रहे पनि मातृभूमिमा परेको महाविपद् र नागरिकको पीडामा साथ दिन सहयोग रकम पठाइएको उनको भनाइ छ। ‘देश विपत्तिमा परेको बेला हामी प्रवासमा रहे पनि मातृभूमिको पीडामा साथ दिन चाहन्छौँ, त्यही उद्देश्यले यो सहयोग गरेका हौँ,’ सुवेदीले भने।
दिपओए कम्पनीले हाल जापानका विभिन्न शहरहरूमा २२ वटा रेस्टुरेन्ट सञ्चालन गर्दै आएको छ। यसअघि पनि विभिन्न विपद्का बेला प्रवासी नेपालीहरूले उल्लेख्य आर्थिक सहयोग गर्दै आएका छन्।
