: अमेरिकी राष्ट्रपति डोनाल्ड ट्रम्पले इरानस्थित रणनीतिक रूपमा महत्त्वपूर्ण मानिने 'माउन्ट कलाङ' मा अमेरिकाले छिट्टै हमला गर्न सक्ने चेतावनी दिएका छन्। शुक्रबार आयोजना गरिएको पत्रकार सम्मेलनमा बोल्दै उनले उक्त कुरा बताएका हुन्।
नतान्ज आणविक संयन्त्रनजिकै रहेको माउन्ट कलाङ दुईवटा गहिरा सुरुङहरू भएको एक अत्यन्त सुरक्षित र किल्लाजस्तै सैन्य ठेगाना मानिन्छ।
पत्रकारहरूसँग कुरा गर्दै राष्ट्रपति ट्रम्पले इरानसँगको अमेरिकी विवादलाई धेरै ठूलो विषय नभएको दाबी गरे। 'धेरै मानिसहरू यसलाई युद्ध भन्दैनन्। म यसलाई केवल एक सैन्य सङ्घर्ष भन्छु, किनभने यो हाम्रा लागि धेरै सामान्य कुरा हो,' उनले भने, 'यो कुनै ठूलो विषय होइन।'
आफ्नो दाबीको पुष्टि गर्दै ट्रम्पले भेनेजुएला र भियतनामसँग तुलना गरे। उनले भने, 'हामीले भेनेजुएलामा कारबाही गर्यौँ र त्यसलाई निष्कर्षमा पुर्यायौँ, जहाँ हाम्रोतर्फ कुनै जनधनको क्षति भएन। इरानसँगको सङ्घर्षमा हामीले १८ जना गुमाएका छौँ, जबकि भियतनाम युद्धमा हाम्रा एक लाख मानिस मारिएका थिए।'
यसैबीच, अमेरिकी उपराष्ट्रपति जेडी भेन्सले पनि इरानमा विगत केही महिनादेखि जारी अमेरिकी सैन्य कारबाहीलाई 'युद्ध' भन्न नमिल्ने बताएका छन्। उनले पनि यसलाई 'सैन्य सङ्घर्ष' को संज्ञा दिँदै अमेरिकाका लागि यो 'अत्यन्तै सामान्य'मामिला भएको दाबी गरे।
