: नुवाकोटको विदुर नगरपालिका–१० स्थित बेत्रावती बजारमा बाढीले पुरिएको घरबाट ११ दिनपछि जीवितै उद्धार गरिएकी महिलालाई उपचारका लागि हेलिकप्टरमार्फत काठमाडौं ल्याइएको छ।
गत भदौ १० गते आएको विनाशकारी बाढीमा परी बेत्रावती बजारस्थित आनन्द श्रेष्ठको घरमा अड्किएकी चन्द्रिका श्रेष्ठलाई सुरक्षाकर्मीको टोलीले अचेत अवस्थामा फेला पारेर उद्धार गरेको हो। उद्धारलगत्तै उनलाई थप उपचारका लागि छाउनीस्थित वीरेन्द्र सैनिक अस्पतालमा भर्ना गरिएको छ।
यसअघि, सुरक्षाकर्मीहरूले माथिल्लो त्रिशूली–१ जलविद्युत् आयोजनामा फसेका एक चिनियाँ नागरिकको पनि जीवितै उद्धार गरेका थिए।
त्यसैगरी, त्रिशूली ३ ‘ए’ को सुरुङभित्र फसेका दुई जनालाई पनि हिजाे (शुक्रबार) सफलतापूर्वक बाहिर निकालिएको थियो। बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बलको संयुक्त टोलीले खोज तथा उद्धार कार्यलाई तीव्रताका साथ जारी राखेको छ।
