: कोशी प्रदेशको राजधानी विराटनगरको धार्मिक तथा सांस्कृतिक पहिचानसँग जोडिएको राधाकृष्ण रथयात्राको ५९औँ संस्करण सुरु भएको छ। शनिबार दिउँसो करिब ३ः३० बजेदेखि राधाकृष्ण मन्दिर परिसरबाट रथयात्रा सुरु भएको हो।
कोशी प्रदेशका मुख्यमन्त्री हिक्मतकुमार कार्कीले राधाकृष्णको विधिवत् पूजाआजा गरी रथयात्राको शुभारम्भ गरेपछि भक्तजनले रथ तान्न थालेका हुन्। रथयात्रामा विराटनगरसहित नेपालका विभिन्न स्थानबाट आएका भक्तजनको उल्लेख्य सहभागिता रहेको छ । भारतका सीमावर्ती क्षेत्रबाट समेत भक्तजन सहभागी भएका छन्।
आयोजकले यस वर्ष रथयात्रामा करिब पाँच लाख भक्तजन सहभागी हुने अपेक्षा गरेको छ। भक्तजनको बाक्लो उपस्थितिका कारण विराटनगरका विभिन्न स्थानमा धार्मिक तथा सांस्कृतिक गतिविधिसँगै चहलपहल बढेको छ। रथयात्रालाई व्यवस्थित र सुरक्षित बनाउन ठूलो संख्यामा सुरक्षाकर्मी परिचालन गरिएको छ।
भिड व्यवस्थापन, रथयात्राको निगरानी तथा सम्भावित आपराधिक गतिविधि नियन्त्रणका लागि प्रहरीले ड्रोनबाट समेत निगरानी गरिरहेको छ। रथयात्राका क्रममा उच्छृंखल गतिविधि गर्ने तथा आपराधिक क्रियाकलापमा संलग्न हुनेलाई तत्काल नियन्त्रणमा लिएर कानुनी कारबाही गरिने प्रहरीले जनाएको छ।
यस वर्ष रथयात्रामा डीजे साउन्डको प्रयोग गरिएको छैन । धार्मिक कार्यक्रमको मौलिकता र आध्यात्मिक वातावरणलाई प्राथमिकता दिँदै आयोजकले डीजेको सट्टा भजन–कीर्तन, धार्मिक झाँकी र परम्परागत प्रस्तुतिलाई प्राथमिकता दिएको हो।
रथयात्रा राधाकृष्ण मन्दिरबाट सुरु भएर तीनपैनी चोक, गोल्छा चोक, मेनरोड, ट्राफिक चोक, रोडशेष चोक र महेन्द्र चोक हुँदै कोशी राजमार्गतर्फ जानेछ । त्यसपछि बरगाछी र दुर्गा चोक हुँदै पुनः राधाकृष्ण मन्दिरमा पुगेर रथयात्रा समापन हुनेछ । करिब आठ किलोमिटर दुरी तय हुने रथयात्राका क्रममा ४४ स्थानमा विश्रामको व्यवस्था गरिएको छ।
राधाकृष्ण रथयात्रालाई विराटनगरको महत्वपूर्ण धार्मिक तथा सांस्कृतिक उत्सवका रूपमा लिइन्छ । प्रत्येक वर्ष नेपालका विभिन्न स्थानसँगै भारतका सीमावर्ती क्षेत्रबाट समेत ठूलो संख्यामा भक्तजन सहभागी हुने गरेका छन्।
