: रसुवाको भोटेकोशीमा आएको बिनासकारी बाढीपछि खोज, उद्धार र राहतको कार्य तीव्र रुपमा भइरहेको छ। त्रिशूलीस्थित नं. १ सैन्य तालिम केन्द्रबाट नेपाली सेना, सशस्त्र प्रहरी र नेपाल प्रहरीले हेलिकप्टर मार्फत खोज, राहत तथा उद्धारको कार्य गरिरहेको हो।
नेपाली सेनाका महासेनानी झविन्द्रबहादुर रेश्मीले बाढी आएको १० औं दिनसम्म ३,२०० भन्दा बढी नेपाली नागरिक तथा २७० भन्दा बढी विदेशी नागरिकको उद्धार गरिसकेको जानकारी दिए। प्रभावित क्षेत्रका ७ वटै टनेलमा नेपाली सेनाको टोली परिचालन गरिएको उनले बताए। त्रिशूली ३ ’ए’ टनेलको १७० मिटर भित्र पुगेर २ जना नेपाली नागरिकलाई जीवितै उद्धार गर्न सफल भएको र खोजी कार्य जारी रहेको उनले जानकारी दिए। त्यस्तै त्रिशूली ३ ’बी’ टनेलको ३० मिटर भित्र पुगेर माटो तथा लेदो हटाउने काम भइरहेको र रसुवागढीटनेलको २७५ मिटर भित्र छिरेर खोजी तथा उद्धार कार्य अघि बढाइएको सेनाले जनाएको छ।
महासेनानी रेश्मीका अनुसार बिदुरको इन्द्रेणी घाटमा तुइन सञ्चालनमा ल्याइएको तथा देवीघाटमा अर्को तुइन निर्माण भइरहेको छ । यस्तै बेलिब्रिज बनाउने काम पनि सुरु गरिएको उनले बताए। उनका अनुसार हवाई उद्धारका अतिरिक्त रसुवा र धुन्चेका विभिन्न १९ स्थानमा जमिनमै फौज परिचालन गरी खोजी, उद्धार तथा राहत वितरण कार्य निरन्तर छ।
त्यस्तै नुवाकोटका प्रमुख जिल्ला अधिकारी शम्भु प्रसाद रेग्मीले स्थानीय प्रतिनिधि र सुरक्षाकर्मीसँग छलफल गरी आवश्यकता भएका स्थानमा अत्यावश्यक सामान ढुवानी सुरु गरिएको जानकारी दिए। नुवाकोटलाई केन्द्र बनाएर रसुवा लगायतका क्षेत्रमा खाद्यान्न मात्र नभई लत्ताकपडा, औषधि तथा अन्य आवश्यक उपकरणहरू वितरण गर्ने व्यवस्था मिलाइएको उनले बताए। रेग्मीले राहत सामग्री ढुवानी र वितरणका लागि २ वटा हेलिकप्टर ‘डेडिकेटेड’ रूपमा परिचालन गरिएको तथा शव व्यवस्थापन तथा सम्बन्धित कामको लागि छुट्टै २ वटा हेलिकप्टरको व्यवस्था गरिएको बताए।
साथै बाढीका कारण अवरुद्ध सडकहरू खुलाउन सडक विभागसँग छलफल गरी साना तथा ठूला सवारी साधन सञ्चालनयोग्य बनाउन तीव्र गतिमा काम भइरहेको उनले जानकारी दिए। बेत्रावती तथा अन्य आवश्यक स्थानहरूमा बेलिब्रिज राख्ने काम अघि बढाइएको उनको भनाई छ । विपद् प्रतिकार्यमा संघ , प्रदेश र स्थानीय तहले आ–आफ्नो क्षमता अनुसार समन्वय गरेर काम गरिरहेको उनले उल्लेख गरेका छन्।
