: गजुरी गाउँपालिका–१ गजुरी बजारस्थित जिल्लाकै पुरानो आदर्श माध्यमिक विद्यालयका बाढीपीडित विद्यार्थीलाई शैक्षिक तथा आवश्यक सामग्री वितरण गरिएको छ।
गत भदौ १० र १४ गते आएको विनाशकारी बाढीबाट प्रभावित बाल बिकासका बिद्यार्थी देखि कक्षा १२ सम्मका ८६ जना विद्यार्थीलाई स्टेशनरी सामग्री, विद्यालय झोला, डायपर, सेनिटरी प्याडलगायतका सामग्री वितरण गरिएको हो।
‘छोरी’ नामक संस्थाको सहयोगमा आयोजित कार्यक्रममा गजुरी गाउँपालिका-१ का वडाध्यक्ष तारा भण्डारीको रोहबरमा विद्यालयका प्रधानाध्यापक सुरेश बस्न्यात र गजुरी गाउँपालिकाका स्रोत शिक्षक सुजन भण्डारीको उपस्थितिमा विद्यार्थीलाई सामग्री हस्तान्तरण गरिएको थियो।
बाढीका कारण विद्यार्थीका शैक्षिक सामग्री तथा दैनिक जीवनमा आवश्यक वस्तुमा क्षति पुगेपछि उनीहरूको पठनपाठनलाई सहज बनाउन सहयोगस्वरूप सामग्री वितरण गरिएको संस्थाले जनाएको छ।
कार्यक्रममा स्थानीय जनप्रतिनिधि, विद्यालय प्रशासन तथा सरोकारवालाले विपद्बाट प्रभावित विद्यार्थीको शैक्षिक निरन्तरताका लागि आवश्यक सहयोग र सहकार्यलाई निरन्तरता दिनुपर्नेमा जोड दिएका थिए।
