: रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार,उपचार,राहत तथा पुनःस्थापनामा सहयोग पुर्याउने उद्देश्यले ॐ हस्पिटल एण्ड रिसर्च सेन्टर प्रालिले प्रधानमन्त्री दैवी प्रकोप उद्धार कोषमा १५ लाख रुपैयाँ सहयोग गरेको छ।
ॐ हस्पिटलका अध्यक्ष डा.आनन्द प्रसाद श्रेष्ठको नेतृत्वमा अस्पताल,चिकित्सक तथा कर्मचारीहरूको संयुक्त सहभागितामा उक्त रकम सहयोग गरिएको हो। विपद्को यस दुःखद् घडीमा प्रभावित नागरिक तथा परिवारप्रति ऐक्यबद्धता जनाउँदै अस्पताल परिवारले सहयोग गरेको जनाएको छ।
अस्पतालका अनुसार कुल १५ लाख रुपैयाँमध्ये अस्पतालका तर्फबाट १० लाख रुपैयाँ,चिकित्सकहरूका तर्फबाट ३ लाख ९९ हजार रुपैयाँ र कर्मचारीहरूका तर्फबाट १ लाख १ हजार रुपैयाँ सहयोग गरिएको हो।
भदौ १० गते बुधबार ल्हेन्दे खोलामा आएको विनाशकारी बाढीका कारण भोटेकोशी क्षेत्रमा भएको अपूरणीय जनधनको क्षतिप्रति ॐ हस्पिटलले गहिरो दुःख व्यक्त गरेको छ।
