: मोरङमा स्कुटरको ठक्करबाट एक जना वृद्धाको मृत्यु भएको छ । स्कुटर चालकसहित दुई जना घाइते भएका छन् ।
प्रहरीका अनुसार बेलबारी नगरपालिका–९ स्थित भित्री सडकखण्डमा स्कुटरको ठक्करबाट पैदलयात्री वृद्धाको मृत्यु भएको हो । लक्ष्मीमार्गबाट डाँगाबजारतिर जाँदै गरेको प्र १–०२–०५३ प ६६५१ नम्बरको स्कुटरले शुक्रबार साँझ ७ बजेतिर ठक्कर दिँदा अन्दाजी ७५ वर्षीय बेग्री राजवंशीको मृत्यु भएको प्रहरीले जनाएको छ ।
बाटो क्रम गर्दै गरेको अवस्थामा स्कुटरले ठक्कर दिँदा गम्भीर घाइते भएकी राजवंशीलाई उपचारका लागि विराटनगरको गोल्डेन अस्पताल पठाइएको थियो । अस्पताल पुर्याउनसाथ चिकित्सकले मृत घोषणा गरिदिएको जानकारी प्रहरीले दिएको छ ।
दुर्घटनामा स्कुटर चालक बेलबारी–८ का १७ वर्षीय अदित खवास र स्कुटरको पछाडि सवार १८ वर्षीय रुमन खवास घाइते भएका छन् । सामान्य अवस्थाका दुवै जनाको विराटनगरको नोबेल शिक्षण अस्पतालमा उपचार भइरहेको छ ।
प्रहरीले घटनाका बारेमा शनिबार बिहान ५ बजेतिर मात्रै जानकारी पाएको थियो । स्कुटरको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट पत्ता लागेको छ । प्रहरीले घटनाको थप अनुसन्धान गरिरहेको छ ।
