: सङ्खुवासभाको मकालु गाउँपालिकामा –१ चिर्खाङमा गोली हानेर एकजना शिक्षकको हत्या भएको छ । कालिका आधारभूत विद्यालयका शिक्षक ३६ वर्षीय नरकुबिर खम्बु राईको गोली हानेर हत्या भएको हो।
जिल्ला प्रहरी कार्यालय सङ्खुवासभाका प्रहरी प्रमुख प्रहरी नायव उपरीक्षक कुमार प्रसाद मैनालीका अनुसार शिक्षक राईको देब्रे कोखमा भरुवा बन्दुकको गोली प्रहार गरी हत्या भएको हो । प्रहरी नायव उपरीक्षक मैनालीका अनुसार शिक्षक राईको बिहीबार राति ७ बजे गोली प्रहारबाट हत्या भएको हो ।
सोही विद्यालयकी शिक्षिका टिकामाया राईले घटाबारे प्रहरीलाई जानकारी गराएकी थिइन् । नरकुबिर खाना खाएको भाडा माझ्न बाहिरा निस्किएको बेला केही पड्किएको आवाज आएपछि शिक्षिका राई बाहिर निक्किएर हेर्दा उनी भुइँमा ढलेका थिए ।
भुइँमा रगत बगेको देखेपछि शिक्षिकाले स्थानीय र प्रहरीलाई खबर गरेको प्रहरी प्रमुख मैनालीले बताए । मैनालीका अनुसार विद्यालय नजिकैबाट शिक्षकमाथि गोली प्रहार भएको प्रारम्भिक अनुसन्धानमा देखिएको छ ।
गोली कसले किन हान्यो भन्नेबारे खुल्न नसकेको प्रहरीले जनाएको छ । ‘म पनि घटनाको थप अनुसान्धानका लागि घटना स्थल तर्फ जाँदैछु ,'जिल्ला प्रहरी प्रमुख मैनालीले भने । घटनाको विस्तृत विवरण अनुसन्धानपछि मात्रै खुल्ने डीएसपी मैनालीले बताए ।
घटनाको सूचना प्राप्त हुनासाथ इलाका प्रहरी कार्यालय हेदाङनाबाट प्रहरी सहायक निरीक्षक मानबहादुर कार्कीको कमाण्डमा सात जनाको प्रहरी टोली घटनास्थलतर्फ गएको बताइएको छ। प्रहरी चौकी नुमबाट प्रहरी सहायक निरीक्षक कमल श्रेष्ठको कमाण्डमा चार जनाको टोली पनि घटनास्थलतर्फ गएको प्रहरीले जनाएको छ। घटनास्थल इलाका प्रहरी कार्यालय हेदाङनागढीबाट करिब ६ घण्टाको पैदल दुरीमा पर्दछ ।
