: अपिहिमाल गाउँपालिका–१ भट्टार गाउँ नजिक गएको पहिरोका कारण जोखिम बढेपछि गाउँपालिकाले स्थानीयवासी तथा यात्रुलाई उच्च सतर्कता अपनाउन आग्रह गरेको छ। गाउँपालिकाका अनुसार शुक्रबार दिउँसो भट्टार गाउँनजिक अचानक पहिरो खसेर चमेलिया नदीको केही भाग पुरिएको थियो।
पहिरो खस्ने क्रम अहिले रोकिएको र हाल चमेलिया नदीको जलप्रवाहमा कुनै अवरोध नरहेको गाउँपालिकाले जनाएको छ।
प्राकृतिक विपत्ति जुनसुकै बेला आउन सक्ने भएकाले आवश्यक सावधानी अपनाउन गाउँपालिकाले आग्रह गरेको छ। पहिरोको जोखिममा रहेका भट्टार गाउँका नागरिकलाई तत्काल आफन्तको घरमा बस्न अनुरोध गरिएको गाउँपालिकाको सूचनामा उल्लेख छ।
पहिरोका कारण मानवीय तथा भौतिक क्षति नभएपनि किसानका बालीमा क्षति पुगेको गाउँपालिकाले जनाएको छ। क्षतिको वास्तविक अवस्था बुझ्न तथा प्रभावित बालीको विवरण संकलन गर्न गाउँपालिकाका कृषि अधिकृत योगेन्द्र डाँगा र विपद् फोकल व्यक्ति नन्दनसिंह ठेकरेलीलाई खटाइएको छ।
यस्तै, पहिरोको जोखिमका कारण विद्यालय आवतजावतमा समेत असर परेको छ। सिति गाउँमा अध्ययन गर्न आउने पहिरोको पारिपट्टिका विद्यार्थीलाई जोखिम कम नभएसम्म सिति गाउँमै बस्ने व्यवस्था मिलाउन पहल गरिएको गाउँपालिकाले जनाएको छ। प्रभावित क्षेत्रका स्थानीयका लागि त्रिपाल, म्याट्रेसलगायत आवश्यक सामग्री गाउँपालिकाको टोलीमार्फत पठाइएको र अवस्थाबारे जानकारी लिने काम भइरहेको सूचनामा उल्लेख छ।
पुलबाट भारी सामान नलैजान आग्रह
भट्टार गाउँको पहिरोका कारण अपिहिमाल बेस क्याम्प पदयात्रा पनि प्रभावित भएको गाउँपालिकाले जनाएको छ। पदयात्रा केही समयका लागि रोक्न पदयात्रीलाई अनुरोध गरिएको छ।
यसैबीच अपिहिमाल बेस क्याम्प पदयात्रामा पर्ने धनवारी भन्के क्षेत्रमा चमेलिया नदीमाथिको काठेपुलको एकापट्टिको भाग भाँचिएकाले यात्रा थप जोखिमपूर्ण बनेको गाउँपालिकाले जनाएको छ।
पुलबाट आवतजावत गर्दा आवश्यक सावधानी अपनाउन, भारी सामान बोकेर पुलमा नहिँड्न तथा पुलको बाटोबाट भारी सामान लैजान खच्चडलगायतका चौपायालाई समेत प्रयोग नगर्न गाउँपालिकाले विशेष अनुरोध गरेको छ।
उक्त स्थानमा पुल निर्माणको काम भइरहेको भन्दै पुल निर्माण सम्पन्न नहुँदासम्म केही समय धैर्य गरिदिन गाउँपालिकाले सबैसँग आग्रह गरेको छ। अपिहिमाल गाउँपालिकाका प्रमुख प्रशासकीय अधिकृत लोकन्द्रबहादुर बिष्टद्वारा जारी सूचनामा प्राकृतिक विपत्तिको जोखिमलाई मध्यनजर गर्दै स्थानीयवासी, विद्यार्थी तथा पदयात्री सबैलाई सतर्क रहन आग्रह गरिएको छ।
