— त्रिशूली नदीमा आएको बाढीका कारण गल्छी–त्रिशूली राजमार्ग तथा त्रिशूली नदीका विभिन्न पुलमा क्षति पुगेपछि अवरुद्ध यातायात वैकल्पिक सडकमार्फत सञ्चालनमा ल्याइएको छ।
रसुवा र धादिङसमेत हेर्ने सडक डिभिजन नुवाकोटले वैकल्पिक सडक निर्माण, मर्मत तथा स्तरोन्नति गरी यातायात सञ्चालनमा ल्याएको हो ।
सडक डिभिजनका अनुसार पृथ्वी राजमार्गअन्तर्गत मास्टारदेखि त्रिशूली पुल पार हुँदै केउरिनीटार, बेलिनटार, आदमटार, पिपलटार, गजुरीटार, नेपालटार र परेवाटार हुँदै धादिङबेंसीसम्म १५ किलोमिटर वैकल्पिक सडक सञ्चालनमा ल्याइएको छ । यो सडकबाट धादिङको गल्छी र सिद्धलेक क्षेत्रका बासिन्दालाई आवतजावतमा सहज भएको छ।
त्यस्तै, त्रिशूलीको दायाँ किनार हुँदै गल्छीबाट कल्लेरीटार, कोशीखोला, पिमलटार, दर्शनटार, छत्रेखोला, गौरीबेंसी हुँदै त्रिशूली बजार र किस्पाङ गाउँपालिकाको सीमासम्म ४० किलोमिटर सडक सञ्चालनमा ल्याइएको छ । यसबाट धादिङको सिद्धलेक तथा नुवाकोटका तारकेश्वर, विदुर र मेघाङ क्षेत्र यातायात सञ्जालमा जोडिएका छन् ।
देवीघाटस्थित क्षतिग्रस्त तादी खोला पुलको विकल्पमा पिपलटार–धमले–निरञ्जना–बाघखोर–हर्रे–देउराली–कोल्पुटार सडकबाट चारपांग्रे सवारीसाधन सञ्चालनमा ल्याइएको छ । ३५ किलोमिटर लामो यो वैकल्पिक सडकले नुवाकोटको विदुर र बेलकोटगढी क्षेत्रलाई जोडेको छ ।
रसुवा आवतजावतका लागि ढिकुरे हुँदै फेदीबेंसीचोक, हिरामुनिटार, चोगते, बोरेभन्ज्याङ, सानोखोला, धनस्वारा, भोर्ले, जिबजिबे र बोगटीटारसम्मको १२ किलोमिटर नुवाकोट खण्डलाई पनि सञ्चालनयोग्य बनाइएको छ । रसुवा खण्डमा सडक मर्मतको काम जारी रहेको सडक डिभिजनले जनाएको छ । उक्त मार्गबाट नुवाकोटको विदुर र सूर्यगढी क्षेत्रलाई रसुवासँग जोड्न सहज भएको छ ।
सडक डिभिजन नुवाकोटले आपतकालीन अवस्थामा विभिन्न उपकरण परिचालन गरी सडक खुलाउने, पहिरो हटाउने, कल्भर्ट निर्माण गर्ने, सडक सतह सुधार गर्ने तथा ग्राभेल राख्ने काम निरन्तर गरिरहेको पूर्वाधार विकास मन्त्रालयले बिहीबार विज्ञप्तिमार्फत जनाएको छ ।
