: भोटेकोशी नदीमा आएको विनाशकारी बाढीबाट प्रभावित बालबालिकाहरूका लागि डडेल्धुराका बालबालिकाहरूले स्वस्फूर्त रूपमा राहत संकलन सुरु गरेका छन्।
जिल्लाका विभिन्न विद्यालयमा क्रियाशील बालक्लब, जुनियर रेडक्रस सर्कल र इको क्लबमा आवद्ध विद्यार्थीहरू मानवीय सहायताका लागि भन्दै राहात संकलन गरिपठाएका छन्। आफूजस्तै विद्यालयमा पढ्ने बालबालिकाहरु बाढीका कारण खान–बस्न र पढ्न–लेख्न पाउने अवस्थाबाट वञ्चित भएको भन्दै विद्यार्थीहरूले आफ्नो दैनिक खाजा खर्च बचाएर रकम संकलन गरिरहेका छन्।
अजयमेरु गाउँपालिकास्थित सहस्रलिङ्ग माध्यमिक विद्यालय चमडाका कक्षा ६ देखि १२ सम्मका विद्यार्थीहरूले आफ्नो दिवाखाजा बापत प्राप्त रु. ८,५८५ संकलन गरी प्रधानमन्त्री दैवी प्रकोप राहत कोषमा जम्मा गरेका छन्।
सोही क्रममा भोटेकोशी किनारमा रहेको श्री महेन्द्र त्रिशूली मा.वि.का विद्यार्थीको ज्यानरक्षाका लागि त्यहाँका प्रधानाध्यापकले खेलेको साहसिक भूमिकाको प्रशंसा गर्दै सहस्रलिङ्ग मा.वि.का प्रधानाध्यापक वीरबहादुर ऐरसहित डडेल्धुराका शिक्षक तथा प्रधानाध्यापकहरूले धन्यवाद एवं समवेदना प्रकट गरेका छन्।
यसैगरी, परशुराम नगरपालिकाको भागेश्वर माध्यमिक विद्यालय सलौनका युवा रेडक्रस, बालक्लब र इको क्लबका विद्यार्थीहरूले पनि खाजा खर्च कटाई रु. ७,५७५ संकलन गरेर प्रधानमन्त्री राहत कोषमा पठाएका छन्। साना नानीबाबुहरूले देखाएको यो मानवीय संवेदना र सहयोगप्रति भागेश्वर मा.वि.का प्रधानाध्यापक करवीर बोहराले विद्यार्थीहरूलाई हार्दिक धन्यवाद तथा सम्मान व्यक्त गरेका छन्।
जिल्ला प्रशासन कार्यालय डडेल्धुराका अनुसार बालबालिकाका साथै अभिभावक, विभिन्न संघ–संस्था र अन्य विद्यालयहरूबाट पनि बाढीपीडितका लागि राहत संकलन गरी पठाउने क्रम जारी छ।
