: झापाको बिर्तामोडमा प्रहरीले एक कार्यालयमा छापामा मारेर ४१ जनालाई नियन्त्रणमा लिएको छ । अवैध रूपमा स्वास्थ्य जाँच तथा औषधि बिक्री–वितरण गरी नेटवर्किङ व्यवसायमार्फत सर्वसाधारणलाई ठगी गरेको आरोपमा ग्लोबल ओरियन्सको कार्यालयमा प्रहरीले छापा मारेको हो ।
बिर्तामोड नगरपालिका–५ स्थित बुद्धनगरमा रहेको ग्लोबल ओरियन्सको कार्यालयमा बुधबार दिउँसो करिब ३ बजे छापा मारेर इलाम घर भएका अर्जुनधारा मल्टी पर्पोजका सञ्चालक सुजन लिम्बू, ग्लोबल ओरियन्सका शाखा प्रमुख पीताम्बर कट्टेलसहित २२ जना महिला र १९ जना पुरुषलाई नियन्त्रणमा लिएको प्रहरीले जनाएको छ ।
प्रहरीले ओरियन्सको कार्यालयबाट विभिन्न प्रकारका औषधि, स्वास्थ्य जाँच गर्ने मेसिन, कागजात तथा केही नगदसमेत बरामद गरेको छ । पक्राउ परेका सबैलाई नियन्त्रणमा लिएर थप अनुसन्धानका लागि इलाका प्रहरी कार्यालय बिर्तामोडमा राखिएको छ ।
प्रहरीका अनुसार शैक्षिक परामर्श तथा तालिम सञ्चालन गर्ने उद्देश्यले खोलिएको अर्जुनधारा मल्टी पर्पोज नामक कम्पनीसँग सहकार्य गरी ग्लोबल ओरियन्सले स्वास्थ्य जाँच तथा औषधि बिक्री–वितरण गर्दै आएको प्रारम्भिक अनुसन्धानबाट खुलेको छ ।
कक्षा १२ पढेका ग्लोबल ओरियन्सका शाखा प्रमुख कट्टेलले होलबडी चेकअप गर्ने भन्दै एउटा मेसिनबाट सर्वसाधारणको स्वास्थ्य जाँच गर्दै आएको प्रहरीको भनाइ छ । उनले स्वास्थ्य जाँच गरेबापत प्रतिव्यक्ति एक हजार रुपैयाँ शुल्क लिने गरेको बताइएको छ । उनीहरूले विभिन्न रोग निको पारिदिने भन्दै गाउँबाट आएका सर्वसाधारणलाई आकर्षित गर्ने गरेको प्रारम्भिक अनुसन्धानबाट खुलेको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ । पक्राउ परेकामाथि अवैध रूपमा स्वास्थ्य जाँच तथा औषधि बिक्री–वितरण र नेटवर्किङ व्यवसायका नाममा सर्वसाधारणलाई ठगी गरेको विषयमा आवश्यक अनुसन्धानपछि कानुनी प्रक्रिया अघि बढाइने प्रहरीले जनाएको छ ।
